Ang Flood Mitigation Project sa Kinalumsan River sa Dakbayan sa Sugbo sugdan sa higayon nga ang mga balay nga kabalahinan andam na alang sa mga informal settler.
Sa press conference niadtong Biyernes, Hulyo 7, 2023, si Cebu City Legal Officer Jerone Castillo niingon nga ang pagtrabaho sa flood mitigation project sa Kinalumsan River nga kabahin sa Task Force “Gubat sa Baha” sa Dakbayan magsugod sa higayon nga andam na ang mga transitional home.
Nanghinaut si Castillo nga ma-bid na kini sa Dakbayan sa Hulyo ug maandam na ang mga transitional home sa Disyembre.
“Di lang sa nato tangtangon hangtod di nato sila mabalhin,” ni Castillo.
Si Castillo niingon nga ang mga nadestino nga river commanders nakaila na sa mga settler nga maapektuhan apan gidid-an sa pagguba sa bisan unsang imprastraktura sa dili pa mahuman ang mga transitional house.
Giklaro ni Division for the Welfare of the Urban Poor (DWUP) head Anthony Librando sa SunStar Cebu nga ang relokasyon kaniadto sa mga settler lahi nga proyekto sa DPWH nga adunay financial assistance.
Ang flood mitigation project sa Dakbayan nga wala pa masugdan magtanyag lang og housing units sa mga apektadong residente. (RJM uban sa UP Cebu Intern Chrys Bernales)