Kapulisan sa siyudad sa Sugbo mosugod na sa pag “rescue” sa mga menor de edad nga manaygon ug magpakilimos sa kadalanan ning nagkaduol na ang Pasko uban sa mga sakop sa Women and Children Protection Desk ug Department of Social Welfare and Services sa Kagamhanan sa Dakbayan.
Nabantayan nga nagkadaghan ang mga batang libud suroy nga moduol ug manuktok sa mga sakyanan dayong panaygon.
Duna say mga hamtong nga magpakilimos dala pa ang gagmay nga mga bata.
Tungod niini, matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nag-awhag sila sa publiko nga kon dunay makita nga mga bata sa kadalanan nga nagpakilimos ug nanaygon, mahimo sila nga makatawag sa labing duol nga police station.
Susihon usab nila kon duna bay sindikato nga nagpaluyo sa maong mga bata ug kon duna, ilang dakpon.
“Kon atong mapamatud-an nga adunay sindikato nga nagpaluyo ani, ato pud paningkamotan nga madakop ni sila sa ilang pagbuhat nga pag-abuso ani nga mga bataa,” matod ni Macatangay.
Dugang niya nga ang mga buhatan sama sa WCPD ug Anti-endicancy Board sa Kagamhanan sa Siyudad magtambayayong sa pag rescue sa mga bata.
Usa sa rason niini aron malikayan nga mabutang sa peligro ang kinabuhi sa mga bata samtang naa sa kadalanan.
Nanawagan ang kapulisan sa katawhan nga kon manghatag, labing maayo nga didto sa mga charity institution itugyan ang hinabang.