Gimandoan ni Liloan, Cebu Mayor Christina Frasco ang kapulisan sa iyang lungsod sa pagpasaka og kasong kriminal sa mga tawo nga gikatahong nagpahigayon og surfing ug skimboarding activities sa iyang lungsod sa taliwa sa Bagyong Odette niadtong Huwebes, Disyembre 16, 2021.
Sa usa ka pamahayag nga gi-post sa Facebook page sa Liloan pipila ka oras sa wala pa ang bagyo mi-landfall sa Sugbo, si Frasco niingon nga una niyang giluwatan ang cease and desist order niadtong nagpahigayon og surfing ug skimboarding activities sa Barangay Poblacion sa amihanang bahin sa Sugbo.
Gihimo kini ni Frasco human makakita og mga hulagway sa mga batan-on nga gikatahong nag-skimboard ug nag-surf sa Poblacion pipila lang ka oras sa wala pa magsugod og kuso-kuso si Odette.
Ang cease and desist order may kalambigitan sa usa ka direktiba nga iyang giluwatan niadtong Disyembre 13 nga nagdili sa mga kalihokan sa mga coastal barangay sa Liloan samtang naghuwat sa pag-abot ni Odette.
Apan nagpadayon gihapon ang mga nisalmot sa surfing ug skimboarding activities bisan og gipahimangnoan na sila sa mga opisyal sa munisipyo. (JKV, PR)