Giangkon sa deputy officer sa Local Vaccination Operations Center sa dakbayan sa Lapu-Lapu, Atty James Sayson, nga dakong hagit karon sa kagamhanan ang pagkab-ot sa 70 porsyento nga herd immunity sa di pa matapos ang 2021.
Kini human nga niminos ang mga nagpabakuna sa mga vaccination site sa dakbayan sa milabayng mga semana.
Gani, di na kaabot og 500 ka tawo ang mobisita sa mga vaccination center sa dakbayan matag adlaw, sumala ni Sayson.
Sa pagkakaron, anaa na sa 51.74 percent ang nabakunahan na, apan kasagaran niini anaa pa lang sa first dose.
Pasabot niini, ang kadaghanan molanat pa og 21 ka adlaw ngadto sa duha ka buwan una ma fully vaccinated depende sa brand sa bakuna nga naturok kanila.
Sa pagduki duki sa LVOC, nasuta nga kadaghanan sa mga nitando sa initial survey sa kagamhanan kalabot sa bakuna mao na usab ang naglangkob sa 51.74 porsyento nga nabakunahan sa pagkakaron.
Ang ilang hagit mao nga unsaon pag kombinsir sa laing 20 porsyento nga magpabakuna sa dili pa matapos ang 2021 sanglit mao kini ang mga nag-ingon nga dili magpakuna o nagduha duha atol sa survey sa kagamhanan.
Usa sa napanglantawan sa LVOC nga paagi nga magpabakuna ang mga unvaccinated sa dakbayan mao ang pagbukas na sa drive-thru vaccination sa Liberty Shrine sa Brgy. Mactan sa umaabot Lunes, Septiyembre 13.
Kaduha na nga wala mahinayon ang pagbukas niini gumikan sa kakuwang sa mga nurse ug doktor.
Pinaagi unya niini, mas sayon ra ang pagpamakuna sa mga Oponganon sanglit anaa ra sila sa ilang mga sakyanan ug dili na kinahanglan monaog ug makig-atubang og laing mga indibidwal.
Aron masiguro hinuon nga malikayan ang paghuot sa mga sakyanan sa vaccination site, limitahan sa LVOC ngadto sa 15 ka sakyanan matag oras ang mahimong makasulod sa vaccination area.
Ang uban adto na maghuwat sa parking area haduol sa shrine nga anaa mahimutang sa may access road sa Mactan Newtown Center.