HUMAN gisirhan sa tibuok adlaw atol sa Sinulog grand parade, gidagsa sa daghang pasahero sa Cebu South Bus Terminal (CSBT) dihang gibuksan kini og balik sa alas 8:00 sa gabii niadtong Dominggo, Enero 20.
Kini sa tinguha sa daghang mga dumuduong ug mga deboto gikan sa kalungsuran nga namista sa dakbayan sa Sugbo nga buot nang mopauli.
Naabtan ug hangtud alas 3 sa kaadlawon sa adlawng Lunes (Enero 21) una nahawan ang terminal.
Matod ni CSBT operations manager Joy Tumulak nga alas 7 pa lang sa gabii niadtong Enero 20, daghan na’ng mga pasahero ang naglinya ug nag-atang gawas sa terminal sa tinguha nga maka-una ug sulod sa subling pagbukas niini.
Alas 8 na sa gabii kini gi-ablihan, subay sa go signal sa Cebu City Transportation Office, nga nibukas na usab sa dalan N. Bacalso. Gisirhan ang dapit tibuok adlaw sanglit kabahin man kini sa rota sa Sinulog grand parade.
Sigun ni Tumulak, gianam-anam lang sa pagpasulod ang mga pasahero tungod sa kadaghan niini.
Nalipay nalang siya nga walay kakulian nga nahitabo ug walay mga “unruly” nga pasahero ang nanulod sa terminal, nga gikan nanambong sa mga kalihukan sa Pista Senyor.
“Walay nahitabong kaguliyang kay sa wala pa gipasu’d ang mga tawo, gi-postingan na man daan sa atong mga personnel. Naa na ma’y mo-guide daan ug asa sila mopa-ingon,” padayag ni Tumulak.
Tungod sa kadaghang pasahero, giangkon ni Tumulak nga nakuwangan ggyud ang mga bus nga makahakot dayon sa tanan.
Gani matod niya, naabtan ug alas 3 sa kaadlawon sa adlawng Lunes, Enero 21 una na-clear ang mga pasahero sa terminal.
Ang mga biyahe paingon sa Toledo ug Carcar maoy nitala sa labing daghan nga sumasakay.
Pagka-alas 6:00 sa buntag kagahapon, Enero 21,, nabalik na usab ang pagdagsang sa dugang pasahero.
“Medyo nagkuwang ta ug bus kagabii (Jan. 20) pero nahurot ra gihapon ug hakot sa atong mga operators,” sigun ni Tumulak.