NAA sa Sugbo karon ang mga pulis nga gipasakaan og Absent Without Official Leave (Awol) sa Philippine National Police (PNP) kay wa na mo report sa ilang mother unit human sila gipalabay gawas sa Central Visaya duha ka tuig na ang nakalabay.
Gipahibawo ni PNP Chief Oscar Albayalde si Chief Supt.Debold Sinas atol sa command conference niini sa PRO-7 niadtong Biyernes nga ang mga pulis gipanglabay kaniadto sa Mindanao ug Northern Luzon tungod sa aligasyon nga nalambigit sa illegal nga drugas.
Apan giingong wa na kini mo report ug namalik, matod pa, dinhi sa Sugbo.
Tungod niini, gimandoan niya ang PRO 7 director nga monitoron ning maong mga pulis kon nibalik ba sa ilang illegal nga kalihukan.
“Mao toy mga report nga nadawat nga basin diay nag involve na pud silag anomaliya. Usa na sa gipabantayan ni Chief PNP (Alabayalde) kay kadaghan niadtong uban nga gibalhin sa ARMM (Autonomous Region in Muslim Mindanao) wala na mang report,” matod ni Sinas.
Wa hinuon motug-an ang PRO7 director kon pila ka pulis ang nag-Awol na sa serbisyo ug mibalik dinhi sa Sugbo nga ipaubos sa surveillance sa Counter Intelligence Task Group ug Drug Enforcement Unit.
Wa na mohatag og bahad si Sinas sa maong mga pulis sanglit nasayod na sila unsay sangpotanan kon magpadayon sila sa ilang illegal nga kalihukan.
Hot spot
Wa na usab makurat pa si Sinas sa gipahibawo ni Albayalde nga hot spot pa gihapon ang Sugbo sa illegal nga drugas.
Matod niya nga tungod niini ilang giisip nga dakong hagit ang maong kasayuran gikan sa ilang labing taas nga opisyal sa kapulisan aron manghingusog pa sila sa ilang pagbatok sa illegal nga drugas.
Apil na niini ang internal cleansing nga usa sa gituohan nga daghan ang supply sa drugas sa Central Visayas tungod sa pipila ka mga pulis nga nalambigit niini.
Iyang mando sa tanang city ug provincial directors nga mohimo og evaluation ug check up sa mga police station alang na sa kahimtang sa illegal nga drugas sa ilang tagsa-tagsa ka lokalidad.
Ang hepe sa Cebu City Police Office Sr. Supt. Joel Doria nagkanayon nga sukad pa sa iyang pag lingkod duha ka tuig na ang nakalabay nahimo nang hot spot ang syudad sa Sugbo sa drugas.
Iyang giklaro nga daghan na sila og nangadakpan diin kinilo nga supply sa drugas ang ilang nangasakmit apan wala sila mohunong ug nagpadayon ang ilang monitoring ug surveillance aron madakpan ang mga dagkong drug player sa syudad.
Ning miaging semana lang moabot na sa kapin usa ka kilo sa gituohang shabu ang nasakmit sa kapulisan sa syudad sa Sugbo nga gibana-bana nga mobalor ang tanan og P18.4 Million.
Matod ni Doria nga gikan sa labing gamay hangtod sa labin dako nga supplier ang ilang gitarget sa ilang sub-sub nga anti drug operation.