MGA tag-iya og sakyanan nga na-impound sa luna sa City of Talisay Traffic Operations Development Authority (CT-TODA) ang gipanagwagan nga kuhaon na.
Kay kundili, irekomendar na kini sa CT-TODA nga ipasubasta sa Kagamhanan sa Siyudad sa Talisay.
Adunay 161 ka mga sakyanan nga anaa sa impounding area sa CT-TODA.
Matod ni Jonathan Tumulak, pangulo sa CT-TODA nga sa 161, aduna kini 133 ka mga motorsiklo, 13 ka mga private vehicle, lima ka traysikad, pito ka tricycle ug tulo ka mga E-bike.
Matod ni Tumulak, anaa sa ordinansa sa siyudad kalabot sa ma-impound nga mga sakyanan nga aduna lang duha ka bulan nga gitagana alang sa pagtipig o pag-istar sa maong mga sakyanan diha sa impounding area.
Apan kadaghanan sa 161, matod ni Tumulak, ang moabot na sa kapin usa ka tuig. Uban niini ang na-impound tungod sa aksidente, ang uban usab ang na-tow o na-clamped human way rehistro.
Gawas nga gihatagan lang og duha ka bulan sa pagtipig diha sa impounding area, gitug-an ni Tumulak, nga napuno na kini ug nga naghatag kini og risgo diha sa ilang lugar nga anaa lang likud sa buhatan sa CT-TODA.
Kay ang mga sakyanan ang aduna pay mga gasolina.
Gikinahanglan lang nila nga bayran ang ilang penalty sa nahimo nga kalapasan nga maoy rason nga na-impound ang sakyanan, uban na ang mga insakto nga dokumento sa sakyanan ug tag-iya, sama sa mga rehistro.
Bayran ang pila ka adlaw o bulan nga na-impound kini, nga mao ang tag P100 nga impounding fee kada adlaw.
Gikatakda ang pagpasubasta sa katapusan sa Oktubre o sa Nobiyembre. (FMD)