Mga tag-as nga kalibre sa armas itunol ngadto sa CCPO

File Photo
File Photo

Ang Cebu City Plice Office (CCPO) makadawat og mga brand new nga mga armas nga gipalit sa Kagamhanan sa Dakbayan sa Sugbo nga gitakda nga ihatag karong adlawa, Martes, Septiyembre 26, 2023.

Pinasidunggang dinapit sa seremonyas mao mismo ang nasudnong hepe sa Philippine National Police (PNP) nga si Police General Benjamin Acorda Jr. atol sa kasaulogan sa PNP Service Anniversary nga ipahigayon sa SM Seaside.

Matod ni Police Lt. Colonel Janette Rafter, information officer ug deputy city director for operations sa CCPO, nga wala pa sila masayod kon pila ka mga armas ug kon unsa nga matang sa armas.

Dugang ni Rafter, dako kini og ikatabang sa ilang padayon nga pagpatunhay sa kalinaw ug kahusay sa tibuok dakbayan kay sila nagkinahanglan og tag-as nga kalibre sa armas.

Matod niya nga ang maong mga armas subay kini sa urban patrolling kay bisan tag-as, magamit kini sa pagsuot-suot sa mga sikit nga kabalayan.

Giangkon ni Rafter nga kompleto na sa armas ang kapin sa usa ka libo ka police personnel, apan kuwang sila sa tag-as nga kalibre sa armas nga gikinahanglan sa highly urbanized nga dakbayan. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph