Ang apektadong mga drayber, konduktor, ug uban pang mga personahe sa nag-ung-ong nga pagsuspenso sa operasyon sa Bagong Jeep (Beep), patrabahuon sa ubang mga kooperatiba sa modernong jeeney aron pagsiguro nga way pagkabalda sa transportasyon.
Si Cebu City Councilor James Anthony Cuenco, chairman sa committee on transportation, niingon sa pakighinabi niadtong Miyerkules, Septiyembre 27, 2023, nga sa iyang pakigtagbo sa Federation of Cebu Transport Cooperative (FCTC), kini nipasalig nga aduna silay igo’ng units nga maka-cover sa bakante nga mga rota sa BEEP.
“Daghan daw mga units nila nga naka-standby maong dili problema nga mo fill in sila,” matod ni Cuenco.
Matod ni Cuenco nga sumala sa FCTC, ila usab nga gipasalig nga andam sila’ng mokuha sa mga drayber ug konduktor nga ma-displace sa cease operation, basta kuwalipikado sila sa standards nga gitakda sa ubang mga kooperatiba.
Si Cuenco niingon usab nga iyang gipangutana ang FCTC kon ang mga unit nga mag-asumir sa mga nabakanteng rota makasugod na dayon sa pag-operate, sanglit nagkinahanglan sila og special permit gikan sa Land Transportation Franchising and Regulatory Board (LTFRB).
Ang FCTC nipasalig kaniya nga ang usa ka espesyal nga permit mahimo’ng ihatag.
Dugang pa, ang Cebu City Traffic Management Coordination (TMC) Board, sa usa ka proposed resolution, niawhag sa LTFRB 7 nga motabang sa pagproseso sa mga permit sa maong mga transport coop aron makaangkon sa mga rota nga bakantehan sa Beep.
Giingon nga ang suspensiyon sa Beep usa ka “disastrous” nga lakang tungod kay makaapekto sa gibana-bana nga 70,000 ka mga pasahero, kadaghanan kanila gikan sa 36 ka business processing outsourcing companies nga nahimutang sa mga rota sa Beep. / AML