Daling gihiklin ang 3,000 ka mga tinun-an sa Sibonga National High School (SNHS) sa Barangay Poblacion, lungsod sa Sibonga tungod sa pag-ulbo sa sunog sa ikatulong andana sa Senior High School Building, alas 8 sa buntag sa Miyerkules, Oktubre 11, 2023.
Ang mga estudyante gipabalhin sa luwas nga dapit sa dakong hawanan sa plaza nga atbang sa eskwelahan.
Sa pagkighinabi sa Superbalita Cebu kang Dalisay Comediero, Department of Education (DepEd) district supervisor sa Sibonga, siya nagkanayon nga ang klase sa mga estudyante sa senior high school building maoy ilang gikansilar.
Apan ang uban nga mga estudyante mibalik sa klase human napawong ang kayo.
Matod pa, dali nga nakontrolar ang kayo ug napawong sa mga bombero.
Basi sa imbestigasyon sa kapulisan sa Sibonga ug kabomberohan, ang sunog nagsugod sa comfort room nga gihimong stock room.
Gibana-bana sa kabomberohan nga dili mominos sa P160,000 ang danyos sa sunog nga padayon pa nga gisusi ang sinugdanan sa kayo.