Kon gihatagan gilayon og pagtagad sa mga kadagkuan sa Carmen Copper Corp. ingon man sa Mines and Geosciences Bureau (MGB) 7 ang namatikdang liki sa bukid, kalikayan unta ang trahedya, matod sa kapitan sa Barangay Biga, Toledo City Pedro Sepada Jr.
Matod ni Sepada sa pakighinabi sa SunStar Cebu nga niadtong Nobiyembre 26, 2020 ang mga barangay opisyal sa Biga nipatawag og emergency consultative meeting tali sa representante sa CCC, Toledo City Government, MGB 7 ug mga residente sa maong dapit aron nga hisgutan ang mga angayang buhaton human nasigpatan ang mga dagkong liki sa bukid.
Apan gipasaligan sa MGB 7 ang mga residente nga luwas ra ang maong dapit, matod ni Sepada.
“Wa man sila’y konkreto nga tubag and then ang OIC nato karon nga si Director Malicse niingon siya nga safe pa man kuno kaayo ang among distance sa maong operation,” matod ni Sepada.
“Karon na katong pagkahitabo, pagka 24, ni-declare naman sila nga unsafe na kuno ang among pagpamuyo diri kay kutob kuno sa maigo sa radius nga 600 meters distance from the pipeline sa Carmen Copper, unsafe na kuno. Asa man diay tong ilang gitabi nga safety pa kaayo?” matod ni Sepada.
RELOCATION
Sa susamang kalambuan, ang Toledo City Mayor Joie Perales ang nimando na sa City’s Housing Board sa pagpangita og permanente nga housing relocation sa maong mga apektado nga residente.
Gisugdan sa Toledo City Hall sukad Disyembre 27 ang pagpabakwit sa 400 ka pamilya nga nagpuyo duol sa mihulpa nga yuta sa mining site sa CCC.
“(It’s) temporary evacuation, but wala pod namo giwala ang idea nga mangita pod anang permanent nga relocation site, kay as to the person nga kinsay mag-determine nga makabalik didto, magpaabot man mi sa advise from MGB 7,” matod pa sa public information officer sa Toledo, John Roseller Layan.
Apan si Sepada sa iyang bahin, ang bugtong sulbad sa maong problema mao ang pagpahunong na sa mina sa Carmen pit.
“Ang remedy ani, i-restore na nila ang nangliki dira unya hunungon na nila ang mina. Di na kinahanglan og relocation site.”
WA PAY TUBAG
Gisuwayan sa pagkuha ang habig ni MGB 7 Regionqal Director Armando Malicse kalabot sa pasangil ni Sepada apan dili kini available atol sa pagsuwat niining balita.
Samtang opisyal sa CCC nga nagdumili sa pagpaila nagdumili sa pagluwat og pamahayag labot sa pamahayag ni Sepada, kay ila unang tutokan ang nagpadayon nga retrieval operation niadtong mga na-missing nga minero.
Si Cebu Governor Gwendolyn Garcia nipahibawo nga ang Kapitolyo igo lang magpaabot sa resulta sa imbestigasyon sa MGB 7 may labot sa insidente, ilabi na nga gimandoan ang CCC sa pagpasuspenso sa ilang mining operation.
“I know that there are certain interests that are playing there that are trying to create a different image. Wa koy gilabanan ha, I want to be objective as possible,”matod ni Garcia.
Tulo ka minero ang naugkat gikan sa mihulpa nga yuta sa Carmen pit sa dihang midahili ang bahin sa bukid niadtong Disyembre 21, 2020 ug adunay unom pa ka tawo ang gikatahong missing.