Usa ka 24 anyos nga babaye nga gituohang dunay depression naluwas gikan sa kamatayon kay daling na-rescue sa mga responder sa Minglanilla Municipal Disaster Risk Reduction and Management Office human niambak sa skywalk sa Sabado sa buntag, Septiyembre 3, sa nasudnong dalan sa Barangay Linao, Lungsod sa Minglanilla.
Si Police Staff Sergeant Mark Rosaroso, desk officer sa Minglanilla Police Station, nibutyag nga nadawat nila ang alarma mga alas 5:40 sa buntag sa Sabado.
Ang biktima nga si Mary (di tinuod niyang ngan), taga Barangay Pakigne sa nahisgutang lungsod, nakaangkon og mga samad. Siya graduwado sa college sa usa ka unibersidad sa Sugbo.
Matud ni Rosaroso nga nakadawat sila og tawag gikan sa usa ka nagpakabana nga tawo human nakita si Mary nga niambak na sa skywalk sa nahisgutang barangay atubangan sa Lipata Central School.
Nasayran nga ang biktima nakaangkon og mga samad sa agtang ug bun-og sa kalawasan.
Sa imbestigasyon sa Minglanilla Police Station, nasayran gikan sa mga kabanay ni Mary nga ang biktima naproblema tungod kay wala pa nadawat sa trabaho.
Giingong pila na ka mga higayon nga kini ni-apply og trabaho apan wala nadawat.
Wala usay tarong nga tulog kun nag insomnia si Mary nga maoy hinungdan nga miabot sa punto nga nawala sa kaugalingon.
Gituohan nga si Mary nag-depression tungod sa iyang mga problema. Ang insomnia usa sa mga timailhan sa depression.
Usa sa gikinahanglan sa mga tawo nga nag depression mao nga duna silay masultihan o masumbongan sa ilang gibati.
Si Mary kasamtangan na karong gi-monitor sa iyang pamilya samtang nagpaalim sa iyang mga samad sa Minglanilla District Hospital.