NIDANGOP sa korte sa dakbayan sa Lapu-Lapu ang Manila Integrated Airport Services (Miascor) Groundhandling Corp. aron mapanalipdan ang dul-an sa 600 ka mga trabahante nga nameligro nga mawagtangan og trabaho kon dili na i-renew sa GMR Megawide Cebu Airport Corp. ang kontrata niini aron padayon nga maka-operate sa Mactan Cebu International Airport.
Ang Miascor nipasaka og petition for injunction sa hukmanan aron pagpugos sa GMCAC nga ilhon ang Letter of Award ug moisyu og lisensiya sa kompaniya aron makapadayon sa ground handling operations sa MCIA.
Matod ni Atty. Earl Versoza, general manager sa Miascor sa Visayas ug Mindanao, nga gibuhat kini nila alang sa kaayohan sa ilang dul-an 600 ka mga empleyado nga maapektuhan kon mahunong na ang ilang operasyon.
“And contrary to claims by GMCAC, a contract between the two parties has been perfected as evidenced by the Letter of Award,” pamulong ni Versoza sa press statement nga nadawat sa Superbalita Cebu.
Apan ang GMCAC unang niklaro nga ang letter of award nga giluwatan niini niadtong Enero 12, 2018 alang sa Miascor kay dili pa usa ka kontrata.
Si Versoza niingon nga gituman sa ilang kompaniya ang tanang mga kondisyon nga nalatid sa Letter of Award sud sa gitakda nga panahon, nakapalit na usab sa gatosan ka milyon ka pesos nga balor sa bag-ong ekipo alang sa maayo nga pagserbisyo niini.
Ang GMCAC wala nay plano nga lugwayan ang serbisyo sa Miascor kay una na kining gipahibawo pinaagi sa suwat nga kutob na lang sila sa Mayo ning tuiga mag-operate sa MCIA.
Moabot sa 70 porsyento ang ground handling operations sa Miascor sa MCIA.
Niadtong Enero, nabalita ang giingong pagpangawat sa luggage sa usa ka overseas Filipino worker sa Clark International Airport. (SCG)