Magsugod na ang pag-ayo sa rubberized oval track sa Cebu City Sports Center (CCSC) sa higayon nga makompleto na sa Cebu City Government ang bidding sa maong proyekto.
Temporaryo nga gisirad-an sa Siyudad ang CCSC niadtong Mayo 18, 2023 aron mahatagan og dalan ang renovation ug repair works sa dul-an sa tulo ka dekada na nga pasilidad nga nahimutang sa luyo nga bahin sa Abellana National School sa Osmeña Blvd.
Ang dakbayan sa Sugbo napili isip host sa Palarong Pambansa 2024 diin ang CCSC maoy nag-unang sporting venue.
Si City Councilor Donaldo “Dondon” Hontiveros, sa pakighinabi niadtong Dominggo, Agusto 13, niingon nga ihatag sa Siyudad ang kontrata sa proyekto ngadto sa mananaog nga bidder karong adlawa, Agusto 14.
Si Hontiveros, kinsa maoy chairperson sa committee on sports ug vice chairperson sa Cebu City Sports Commission, niingon nga tulo ka kompanya ang nisalmot sa bidding, apan wa siya makahatag sa ilang mga ngan.
Matod niya, usa sa mga bidder ang nagtukod sa oval track sa Carcar City ug City of Naga, ang usa nagtukod og oval track sa Bacolod City, samtang ang final bidder nagtukod sa oval track sa Philippine Institute of Sports Complex, o kanhi nailhan nga the University of Life Theater ug Recreational Arena.
Giaprobahan sa City Council ang alokasyon nga P53,275,161.40 alang sa proyekto atol sa regular session niini niadtong Hunyo 7.
Si Hontiveros miingon nga ang Siyudad maoy moabaga sa gasto sa pag-ayo ug pagpaayo sa rubberized oval track, apan magsalig kini sa tabang sa pribadong sektor sa pag-ayo sa ubang mga pasilidad sa sports facility.
Ang rubberized track oval katapusang giayo niadtong 2012 sa kantidad nga P26 milyunes.
Si Sports Commissioner John Pages, sa miaging interbyu, nagkanayon nga ang sports community makatabang usab sa Siyudad sa pagpalambo sa CCSC.
Ang Siyudad karon nagtrabaho sa swimming pool.
Kaniadto niingon si Pages nga mokabat sa P30 milyunes ang gikinahanglan aron ma-renovate ang swimming pool.
Matod ni Hontiveros, ang pundo alang sa pagpaayo sa swimming pool gikan sa kita sa CCSC uban sa pribadong sektor.
Gidugang niya nga gipaabot nga mahuman ang pagtrabaho sa swimming pool sa Septiyembre o Oktubre.
Matod ni Pages, ang pool wala na ma-rehabilitate sukad natukod ang sports center niadtong 1994, dihang ang Cebu City katapusang nag-host sa Palarong Pambansa.
Samtang, si Hontiveros nagkanayon nga positibo siya nga makab-ot sa Siyudad ang target niini nga mahuman ang tanang renovation ug repair works sa Disyembre.
Sigon ni Hontiveros nga ang tanang mga bidder misaad nga makaabot sa deadline sa pagkompleto human sila gihatagan og schedule sa umaabot nga mga kalihukan sa oval track.
“Ang uban niingon (sila) nga kaya, (so) kaya ra man. Kahibawo sab sila sa mga (umaabot) nga aktibidad,” dugang ni Hontiveros.
Gawas sa pag-host sa Palarong Pambansa 2024 sa Hulyo, ang Cebu City mopahigayon usab sa Cebu City Olympics sa Pebrero, ug host sa Central Visayas Regional Athletic Association sa Mayo.
Si Hontiveros nagkanayon nga ang mga opisyal ug sektor nga nalambigit sa Palarong Pambansa 2024 magtagbo karong Lunes aron hisgotan ang mga plano alang sa grandstand ug badminton area.
Matod niya, ila usab nga hisgutan ang posibilidad nga maablihan sa publiko ang oval track samtang wala pa magsugod ang renovation niini.
Apan sa pag-anunsyo sa mananaog nga bidder niadtong Lunes, siya miingon nga ang trabaho mahimong magsugod sulod sa semana.
Matod usab niya, alang sa kaluwasan sa mga tiggamitan ang pagsirado sa pasilidad samtang adunay improvement works nga gihimo sa sulod.
Sa miaging report, ang CCSC nikita og average nga P60,000 kada adlaw sa wala pa kini gisira niadtong Mayo 18. Mokabat sa P17,500 ang gikan sa kita sa oval track.
Base sa datos sa pagdumala sa pasilidad sa sports, ang CCSC nag-atiman sa kasagaran nga 700 ka tiggamit kada adlaw.
Matod ni Hontiveros, ang kita sa CCSC maoy gigamit sa pagmintinar niini.
Si Mayor Michael Rama, sa uwahing pakighinabi, nikonsiderar nga gamay ra ang kantidad kon itandi sa kita sa Siyudad sa higayon nga ablihan na usab ang pasilidad nga adunay gipaayo nga mga pasilidad. / JJL