Suspek sa pagpatay sa usa ka seaman niadtong Enero 22, 2023 sulod sa usa ka diskohan sa Sityo Villa San Pedro, Barangay Tulay, Lungsod sa Minglanilla, nitahan sa buhatan ni Cebu City Councilor Philip Zafra niadtong Martes, Enero 31,2023.
Si Benjie Sanchez Dolino, hingkod, maoy suspek sa pagpusil-patay kang Newlbert Ontua Candavid, 25, taga lungsod sa San Francisco, Agusan Del Sur ug trabahante sa Posiedon 45 nga nakaangkla niadtong higayona sa Barangay Tulay sa nahisgutang lungsod.
Matud ni Police Major Arieza Otida, hepe sa Minglanilla Police Station, pasado alas 2:00 sa hapon, nitahan si Dolino sa buhatan ni Zafra.
Ang suspek dunay kabanay nga sakop ni Zafra hinungdan nga sa buhatan siya sa konsehal nitahan.
Sa interview ngadto kang Dolino, nipadayag nga nag-inom sila sa iyang mga higala uban sa iyang anak nga 12 anyos nga babaye atol sa disko sa Tulay.
Wala magdugay, dason ni Dolino, ang grupo sa biktima naabot ug nasabdan ang ilang mga botelya. Gibadlong ni Dolino ang biktima dayon niresulta ang panagsumpaki ug iyang nakita nga gisiko sa naulahi ang iyang anak.
Asoy pa sa suspek nga sa pagbiya nila, giatangan sila sa gawas ug didto na siya gisumbag makaduha ka higayon. Nisukol siya ug iyang napusilan ang biktima makadaghan nga higayon.
“Nawagtang na gyud ko, Sir, tungod sa akong kalagot. Nagbasol ko kay nalayo ko sa akong pamilya pero wa na koy mahimo kay nahitabo naman,” saysay ni Dolino.
Si Otida nitataw nga case cleared na ang pagpasaka nila og kasong murder sa dinakpan ug karon case solved na kay nitahan na man ang responsable sa krimen.