USA ka policewoman gipusil-patay sa iyang bana nga usa usab ka pulis human gisanapan sa tumang pangabubho sa ilang pinuy-anan sa Barangay Centro, lungsod sa Tubigon, lalawigan sa Bohol kagahapon sa alas 7:00 sa buntag, Lunes, Enero 27.
Si Police Staff Sgt. Juliet Tuquib, nadestino sa Women and Children’s Protection Desk (WCPD) sa Clarin Police Station sa Bohol Provincial Police Offcice (BPPO), nakaangkon og samad pinusilan sa iyang ulo ug lawas.
Kritikal usab ang iyang bana nga pulis nga si Police Staff Sgt. Ariel Tuquib, kanhi sakop sa Tubigon Police Sation apan kasamtangang gibutang sa Regional Police Holding and Accounting Unit (RPHAU) 7, nagpusil sa kaugalingong ulo.
Si Police Captain Robert Lucernas, hepe sa Tubigon police nga nahinabi sa Superbalita Cebu, nibutyag nga sayo kagahapon sa buntag, nakadawat sila og impormasyon sa shooting incident.
Dugan ni Lucernas, pag-abot sa iyang mga sakop sa dapit, nagbuyod na sa ilang lawak ang asawa nga may samad sa iyang ulo ug sa dughan nga nagbabag sa pultahan sa balay.
Ang bana nga pulis Tuquib naghagba sad didto sa ilang lawak nga way panimuot apan nagginhawa nga nay samad pinusilan sa ulo.
Nakuha sa kapulisan gikan sa crime scene ang armas nga 9mm Glock pistol nga gituohan nga service firearm nga iya sa biktima nga mao usab ang gigamit sa bana sa pagpusil sa iyang asawa.
Matod ni Lucernas, pangabubho o selos ang motibo sa krimen.
Ang katabang ug anak nga 12-anyos ningsulti nga ang duha magsige og away sukad sa miaging semana tungod sa pagpangabubho sa lalake.
“Sige daw kini og selos sa iyang asawa kay gatuo siya dunay laing karelasyon mao nang mag-away siguro dala na ni sa iyang sakit na depresyon,” dugang ni Lucernas.
Atol sa hitabo, ang mga anak sa magtiayon nga 12- anyos nga lalaki ug 8-anyos nga babaye didto natulog sa pikas lawak, apan ang katabang wala diha niadtong higayona, nakadungog na lang sila og butobuto sa armas.
Si Lucernas nibutyag nga si Ariel Tuquib nagpaabot sa pagkahuman proseso sa iyang papeles alang sa iyang early retirement gumikan sa iyang nga sakit diin siya nakasinatig depresyon
“Giingong gipatambalan na sa iyang pamilya ang maong bana nga pulis apan sa gihapon lahi ang iyang pagkatawo subay niining pagsuwat,” dason niya.
“Murag dili naman pwede sa iyang trabaho kay risk man siya kung mamulis pa siy..: dugang ni Lucernas.
Atol ning pagsuwat, ang bana naa pa sulod sa sa intensive care unit (ICU ) sa usa ka ospital sa Tagbilaran City.