Usa sa tulo nga nagpabiling missing nga mga crew sa M/V Ida nga tugboat nakit-an na sa hapon sa Martes, Abril 26,2022.
Bisan kon nadugta ang lawas ni Rolly Conejos, crane operator, giila siya sa iyang asawa pinaagi sa brand sa iyang paboritong underwear.
Napalgan ang iyang lawas sa nagpadayon nga pagsawom sa mga sakop sa Philippine Coast Guard nga nagpahigayon og retrieval operations sugod sag Disyembre 2021 human sa bagyong Odette (Rai).
Si Joan Conejos Belano, maguwang ni Rolly, nipahibawo sa Superbalita Cebu, nga napalgan na ang iyang igsuon human sa upat ka buwan kapin nga pagpangita sa mga na missing sa mga crew sa M/V Ida.
Una nang gipahibawo ni Captain Alvin Dagalea, commander sa PCG Cebu, nga ang upat sa pito ka mga crew nangakit-an sa manag lahi nga mga petsa.
Sila si Luciano Roble (Master), Arthur Sarveda (chief engineer), Ricardo Payot Jr. (ordinary seaman) OS, ug Richard Marilao (Chiefmate) una nang nangakit-an.
Pabiling missing sila si Ronel Fernandez (OS) ug, Artemio Bondaog (oiler) ug padayong pangitaon.
Dako ang pasalamat ni Joan sa PCG nga ang iyang maguwang nga si Rolly nakit-an human sa pipila ka buwan nilang pag-ampo.
Ang tugboat nipasalipod unta sa anchorage area niadtong Disyembre 16 apan nalunod gihapon tungod sa kadagko sa mga bawod ug kakusog sa hangin dala sa super typhoon.