Traysikad driver nga nag-advance og birthday party pinaagi sa inom namatay human nadasmagan alas 8:30 sa gabii sa Biyernes sa national highway sa Brgy. Guimbuangan, lungsod sa Barili.
Namatay sa tambalanan si Richard Pasigna, 46, ulitawo, nagpuyo sa nahisgutang lugar human madasmagi sa Toyota Hilux Pick-up nga gimaneho ni Mario Manapsal, 39, minyo, taga Brgy. Malalay, lungsod sa Ronda.
Si Police Staff Sgt. Jeffrey Alpas sa Barili Police Station nga nahinabi sa Superbalita Cebu nagkanayon nga si Pasigna hubog gikan nag-inom uban sa mga higala.
“Nag-advance birthday party daw ni siya. Tagaytagay uban sa mga barkada. Karong Dominggo gyud iyahang birthday, nahubog milabang sa karsada, nadasmagan,” dugang ni Alpas.
Si Manapsal nibutyag kanila nga gikan siya sa dakbayan sa Sugbo padulong mopauli sa lungsud sa Ronda.
Paspas iyang dagan unya ngitngit ang national highway kay blackout.
Si Pasigna nga hubog uban sa iyang mga higala, kalit nga nilabang hinungdan nga nadasmagan.
Ang biktima nakaangkog grabing kadaot sa ulo ug kalawasan.