Tiil sa ginang naputol hinungdan nga namatay dihang gidaro sa usa ka tanker ilang motorsiklo alas 4:54 sa hapon sa Lunes, Hulyo 10, sa Sitio Napo, Brgy. Bonbon, lungsod sa Aloguinsan, kasadpang habagatan sa Sugbo.
Si Pacita Erika Mae Hortezuela, 20, dunay kapuyo, taga Purok 4, Brgy. Poblacion, lungsod sa Aloguinsan, patay nang niabot sa tambalanan.
Naa sa kritikal nga kahimtang ang iyang kapuyo nga si Roel Adan, 32, kinsa nagmaniho sa Honda Beat 110 nga motorsiklo.
Gitanggong si Paul Ogates, 35, minyo, driver sa tanker, taga Brgy. Budbud, lungsod sa Barili.
Si Police Captain Jose Talandron, hepe sa Aloguinsan Police Station nga nahinabi sa Superbalita Cebu sa Martes, Hulyo 11, nagkanayon nga ang mga biktima padulong unta sa lungsod sa Pinamungajan samtang ang tanker truck gikan sa dakbayan sa Toledo.
Matod ni Talandron nga si Ogates kusog kaayo nga nakapadagan padulong sa lungsod sa Barili.
Si Ogates ni-overtake sa usa ka tricycle sa blind curve nga karsada ug gikasugat ang motorsiklong gisakyan sa duha ka mga biktima.
Wala na makontrolar ni Ogates ang manobela sa tanker, iyang nadaro og pipila ka metros ang mga biktima.
Sumala ni Talandron nga napasok sa ilawom sa tanker si Hortezuela hinungdan sa pagkaputol sa iyang tuong tiil nga nalatayan sa ligid.
Nakalingkawas sa tinong kamatayon ang ka live-in.
“Ang driver sa motorsiklo milihay unta siya dihang mipadulong ang tanker pero apike na naabtan sila gidaro,” dugang ni Talandron.
Gipadayag niya nga nagdali ang driver sa tanker nga makauli sa Barili hinungdan nga kusog nga nakapadagan.
Gitanggong una nila ang driver samtang nagpaabot sa kabanay sa mga biktima.
Matod ni Talandron nga dunay pasiunang panagsabot sa duha ka mga habig apan wa pa masayri ning pagsuwat kon duna bay amicable settlement.
MANDAUE CITY
Unom ka sakyanan nalambigit sa vehicular accident sa Mandaue City.
Garbage truck ug tanker nagsungag sa dan M.L. Quezon, Brgy. Maguikay, Dakbayan sa Mandaue nga nipagan sa private car ug tulo ka mga motorsiklo pasado ala 1 sa hapon sa Martes, Hulyo 11, 2023.
Pulos nangaangol ang mga drayber sa garbage trak ug tanker, kinsa gipanghulagway nga nangapiit.
Si Police Staff Sergeant Jimeon Dapar, Traffic Enforcement Unit (TEU) sa Mandaue City Police Office (MCPO), niila sa mga nangaangol nga sila si Noemer Candelaria Berico, drayber sa pribadong trak sa basura, taga Barangay Lamac, Consolacion, ug Ernesto Enolpe Glipa, drayber sa tanker, taga Ylaya, Barangay Cotcot, lungsod sa Liloan, Sugbo.
Sa imbestigasyon nasayran nga ang trak sa basura paingon unta sa Cabancalan samtang ang tanker paingon sa taytayan sa Brgy. Maguikay.
Apan sa pag-abot na sa eskina M.L. Quezon pasulod paingon sa barangay hall sa Maguikay, sila nagkaengkuwentro human gilikayan ang usa ka taxi nga paingon mo U-turn sa maong dapit.
Ang trak sa basura nga nilihay sa taxi nalahos ngadto sa tanker.
Atol sa hitabo, napagan ang KIA Sportage ug laing tulo ka mga motorsiklo. (BBT / GPL)