Bisan gi-park su’d sa gate sa usa ka balay ug udtong tutok, kursonada ang usa ka kawatan nga nisulod ug gikuha ang mountain bike nga nagkantidad og P20,000 sa Barangay Poblacion, lungsod sa Argao, Dominggo, Oktubre 15, 2023.
Kini ang asoy sa tag-iya sa biseklita nga si Reygie Remando, 21, ulitawo, taga Barangay Sua, Argao sa interbyo sa Superbalita Cebu.
Matod niya nga niadto siya sa balay sa iyang classmate sa Poblacion kay dunay importanteng tuyo sakay sa iyang mountain bike.
Sa dihang mopauli na unta, dako niyang kahibung nga wa na ang iyang mountain bike sa iyang gibutangan.
Sa ilang pagtan-aw sa footage sa CCTV camera , nasuta nga gikuha kini ug gisakyan sa wala pa mailhing kawatan.
Samtang, si Remando nagpatabang nga kon si kinsa ang nakakita sa kawatan o baligyaan og mountain bike nga kadudahan, mo-report dayon sa kapulisan sa Argao o ngadto sa labing duol nga presinto sa kapulisan.