Target sa pangu sa Cebu South Bus Terminal (CSBT) nga mahibalik ang dagkong kita niini sa panahon nga wala pa moigo ang pandemiya sa nasod ug normal pa ang pagbiyahe sa mga pasahero.
Si Carmen Quijano, manager sa CSBT ug North Bus Terminal, nagkanayon nga bisan kon inanay nang nibalik ang mga pasahero ilabi na sa mga gustong molaag sa mga tourist destination sa lalawigan sa Sugbo, wa pa kaabot sa pre-pandemic nga kita ang nisulod sa panudlanan sa terminals.
Subay sa datos ni Quijano, moabot sa P5.5 milyunes ang natala nga kita sa terminal sa Abril 2023.
Mas ubos kini kon itandi sa pre-pandemic nga mga higayon diin moabot og tag P6 milyunes o labaw pa ang kita sa CSBT matag buwan.
Hinuon nakita niya nga anam-anam nang nakabangon ang terminal sukad sa pagbalik na sa physical nga pagtungha ug pagbalik sa mga turista ingon man mga trabahante.
"...at that time nga wala pa ang Covid, ang management mokita og P6.7 to P7 million a month. Pag Covid mokita lang mi og P200,000 hangtod nga nagkadako nagkadako," matod ni Quijano.
"Karon I'm happy niabot tag P5 million kapin pero sa akong tan-aw, 70 percent pa, wa pa gyud ko katugkad nga modagan pa og P6 million ug more pa. Mao nay gustong maabot nako," dugang niya.
Sa panahon nga miigo ang pandemiya sa nasod, anaa lang sa P200,000 ang kita niini matag buwan.
Gawas sa CSBT nakita usab ni Quijano ang padayong pagsaka sa kita sa CNBT.
