Nabiktima sa ‘romance scam’ online nagkadaghan, butyag sa National Bureau of Investigation Central Visayas (NBI-7) atol sa ‘Openline Forum’ sa news outlet nga MyTV sa Martes, Septiyembre 27, 2022.
Gitug-an ni Maria Contessa “Coco” Lastimosa, special investigator sa NBI-7, nga ubay-ubay nang taga-Central Visayas ang nangailad sa maong modus sa online.
Kon basehan ang talaan sa buwan sa Septiyembre, adunay lima nga ning-report sa NBI, wa pay labot sa upat ka mga biktima niadtong Agusto.
Dugang pa niya nga adunay mga kaso nga wa lang gitaho sa ilang buhatan, diin sagad sa mga nangabiktima kadtong mga biyuda o biyudo ingon man senior citizens.
Modus sa scammers mao nga magpatuo nga US military servicemen ug kuhaon ang pagsalig sa ilang biktima hangtod nga mosangpot sa online relationship ug mosaad nga makig meet-up.
Hangtod nga ilang pangayoan og kuwarta ang ilang biktima aron nga ilang ipalit og airline tickets apan way meet-up nga mahitabo.
Laing modus mao nga magpatuo nga adunay ipadala nga package apan natanggong kini sa Bureau of Customs (BOC) tungod kay aduna kiniy sulod nga diamante, dako nga kantidad sa salapi ug uban pa hinungdan nga gikuwestiyon ang maong kargamento o bagahe.
Apan aron nga ma-release kini, ilang pangayoan og kuwarta ang biktima aron ibayad sa maong bagahe aron kunohay ma-release sa BOC.
Ilad lang ang tanan sa higayon ang biktima makapadala na sa kantidad.
Si Lastimosa nipahinumdom sa publiko nga magmatngon sa tawo nga ilang gika-transact ilabi na nga wa nila igkita ug diha lang sa online naila-ila.
“You don’t even know if that person is real or just a cyber criminal. It will not only leave you broke, but also heartbroken,” pahinumdum ni Lastimosa.