Usa ka dalaga nga nag-jogging pasado alas 5 sa buntag sa Huwebes, Hulyo 6, sa Cebu South Coastal Road duol sa taytayan sa utlanan sa dakbayan sa Sugbo ug Talisay city gitulis sa duha ka mga lakaki nga nagsakay og motorsiklo.
Ang biktima giila nga si Nova Belle Sente Villapaz, 30, taga Barangay Dumlog, dakbayan sa Talisay.
Asoy sa biktima nga samtang nag-jogging siya gikan sa Dumlog, paingon sa Il Corso, pag-abot sa eskina paingon sa usa ka condominium, iyang nakita ang usa ka motorsiklo nga naghunong sa unahan nga dunay sakay nga duha ka mga lalaki.
Sa dihang duol na siya, ang backrider nikanaug ug dayong tion sa armas nga iyang gituohang .45 kalibre nga pistola ug nideklarar og tulis.
Ang tulisan nimando nga ihatag ang dala niini nga belt bag.
Tungod sa kahadlok, gihatag sa biktima ang maong butang nga dunay sulod nga Iphone 13 Pro nga mobalor og P70,000 ug dayong sibat sa mga tulisan.
Ang duha pulos wala maka helmet ug naklaro niini ang panagway.
Gani ang usa ani dunay black eye sa walang mata.
Matod ni Police Major Jonathan Bethooven Taneo, hepe sa Mambaling Police Station, nihimo na sila karon og imbestigasyon aron pag-ila sa duha ka mga tulisan. (AYB)