Gipasakaan na og kaso nga concubinage ang bana ug giingong kabit niini niadtong Huwebes, Agusto 31, 2023 sa Cebu City Prosecutor’s Office.
Ang duha naabtan sa asawa ug kapulisan sa Fuente Police Station niadtong Martes sa buntag, Agusto 26, 2023 sulod sa lawak sa usa ka motel sa Dan Gorordo, Brgy. Kamputhaw, Dakbayan sa Sugbo.
Ang bana giingong ni-post sa social media account og “team building” sa wa pa sila maabti sulod sa motel sa iyang asawa nga nibutang og tracking device sa iyang motorsiklo.
Nangatarungan ang bana, 27, team leader sa usa ka call center company, nga nag-estorya lang sila sa iyang sakop nga babayeng 20-anyos.
Ang asawa nagduda nga dunay laing gikabuangan ang iyang bana kay kanunay dugay mauli ug di na siya makaabli sa ilang joint account sa social media.
Tungod niini, nipalit siya og tracking device sa online seller ug wa nasayod ang iyang bana nga gibutangan kini niya. Iyang nasubay ang nahimutangan sa iyang bana pinaagi niini.
Ang duha naa pa sa selda sa Fuente Police Station, apan gipaabot nga sa Lunes makagawas na kon sila makapyansa sumala sa itakda sa korte.