Gironda sa mga operatiba sa Philippine Drug Enforcement Agency (PDEA) Central Visayas ang usa ka drug den sa Sitio Tugas, Barangay Mambaling, dakbayan sa Sugbo niadtong Biyernes sa hapon, Enero 6, 2023, ug nasikop ang lima ka tawo.
Ilang nadakpan ang mga suspek nga sila si Christ Jay Abellanosa, 27; Juvelyn Tabalin, 30; Pacito Jorge Campos, 36; ug Ramon, Tabalin, 55, sa akto nga nagsuyop og shabu.
Nasikop usab ang drug maintainer nga si Rogelio Camilo Jr., alyas Butchoy, 46, ang target sa ilang operasyon.
Nakuha gikan sa mga suspek ang pito ka mga sachet sa shabu nga motimbang og 10 gramos nga gibanabanang mobalor og P68,000.
Narekober usab sa mga operatiba ang P240 nga buy-bust money ingon man ang halin sa illegal nga druga ug daghang drug paraphernalia.
Ang mga ebidensiya gi-turnover sa PDEA 7 laboratory alang sa eksaminasyon ug pagsusi.
Matud ni Leia Albiar-Alcantara, information officer sa PDEA 7, nga ilang gikonsiderar nga high-impact operation ang pagbungkag sa usa ka drug den sanglit nahimo na kining breeding ground sa mga kriminal.
Matud niya, ang operasyon niadtong Biyernes maoy una nilang operasyon batok sa usa ka drug den karong tuiga human sa pagpahigayon og case build-up sulod sa usa ka buwan.
Matud niya, nakadawat sila og impormasyon gikan sa usa ka residente nga si Camilo namaligya og 20 gramos nga shabu matag semana.
Siya nibutyag nga kadaghanan sa iyang mga kustomer mga construction worker, taxi driver ug walay trabaho.
Matud ni Alcantara, ilang giandam ang kasong kalapasan sa Republic Act 9165 o Comprehensive Dangerous Drugs Act of 2002 batok sa mga suspek ngadto sa piskaliya.