Usa ka person with disability (PWD) nagmaoy sa kahubog, nadunggaban, sa alas 9 sa gabii sa Martes, Okubre 11, 2023, sa Purok 3, Sitio Moryo-moryo, Barangay South Poblacion, dakbayan sa Naga.
Si Mariano Pansoy Exequiel, 66, ulitawo, dunay deperensiya sa mata, lumolupyo sa nahisgutang lugar, nakaangkon og samad dinunggaban sa nagkalainlain nga bahin sa lawas.
Ang suspek giila nga si Eleuterio Pansoy Veloso Jr., 54, minyo, silingan sa biktima, nisibat human sa krimen.
Si Police Staff Sgt. Ariel Yap sa Naga Police Station nga nahinabi sa Superbalita Cebu, nagkanayon nga hubog ang biktima ug gibadlong sa suspek aron mopauli ug makapahuway.
Apan nasuko ang biktima hinungdan nga nagkalalis ang duha dayon nikuha og kutsilyo si Veloso nga gigamit sa pagdunggab kang Exequiel.
Ang biktima nalandig sa tambalanan sa Naga apan gibalhin sa Vicente Sotto Memorial Medical Center (VSMMC).