KRITIKAL nga gidala sa usa ka pribadong tambalanan ang usa ka driver sa motorsiklo nga ninabangga sa usa ka PUJ sa dalan Escario, corner Acacia, Barangay Kamputhaw, syudad sa Sugbo pasado alas 6 Huwebes sa buntag Marso, 14.
Ang biktima giila nga si Gezer Canoy, taga barangay Guadalupe, siyudad sa Sugbo, nga nagmaneho sa iyang Honda XRM (GD 37135).
Matod sa mga imbestigador nga nagsubay si Canoy sa dalan Acacia, apan sa iyang pag tabok sa dalan Escario, siya nabangga sa PUJ (GXD 934) nga gimaneho ni Roger Monterona,taga Mohon, syudad sa Talisay.
Tungod sa kakusog sa pagbangga, nagupok ang windshield sa PUJ ug naparok ang ulo ni Canoy hinungdan sa grabe kadaot nga naangkon niini sa ulo.
Wa pa masayri sa mga imbestigador kon unsay kahimtang ni Canoy sulod sa usa ka pribadong tambalanan diin siya gidala.