Girekomendar na sa Office of the Cebu City Prosecutor ang pagpasaka og kaso batok sa lima ka mga lalaki nga giingong nalambigit sa karambola ug pagpamun-og ni Michelin Star Chef Jason Atherton ug sa giingong pagbugalbugal sa menor de edad niining anak sa F Cafe niadtong Disyembre 24 sa miaging tuig.
Ang Kapitolyo nga nakadawat sa joint resolution sa Agusto 15, 2023 nipahibaw sa mga tigbalita sa maong kalamboan.
Sa resolusyon nga gilagdaan ni Assistant City Prosecutor Misty Leah Escolar-Hupp ug giaprubahan ni City Prosecutor Liceria Lofranco-Rabillas ug Deputy City Prosecutor Maria Theresa Calibugan-Casiño, girekomendar ang pagpasaka og kaso batok kanila ni Butch Prieto Soreno, Inaki Ramon Bernedo Ibarlucea, Jericho Leonardi Porras Bolongan, Richard Doncillo Cervantes, ug Douglas Cervantes.
Kini labot sa kasong may kalapasan sa Republic Act 7610 (Special Protection of Children Against Abuse, Exploitation and Discrimination Act), batok kang Soreno tungod sa giingong pag-imbitar sa 17-anyos nga anak ni Atherton aron makighilawas sulod sa pansayan sa naasoy nga restobar.
Gawas ni Soreno, pasakaan usab og kasong may kalapasan sa Section 4, in relation to Section 15 sa Republic Act 11313 (Safe Spaces Act) ang lima tungod sa giingong pagpanutok, pagkantiyaw, ug pagbugalbugal sa menor de edad.
Mag-atubang usab og kasong physical injuries ang mga akusado tungod sa nahitabong karambola ug pagpamun-og nga niresulta sa pagkaangol sa langyaw.
Unang niluwat og pamahayag si Cebu Governor Gwendolyn Garcia pinaagi sa personal social media post sa Disyembre 28, kabahin sa iyang kasagmuyo sa mga nagduma sa restobar human giingong gitabangan pagkulata si Atherton sa mga personnel niini.