DAKONG pasidaan sa mga naadik sa duwa sa computer labi na sa mga bata.
Usa ka 19 anyos nga ulitawo ang napalgang patay kagahapon, Biyernes, Hulyo 12, alas 7:00 sa buntag, sulod sa usa ka tindahan sa Sitio Nasipit sa Barangay Talamban, dakbayan sa Sugbo.
Giila ang namatay nga si Roldan Gonzaga, 19, nagpuyo sa samang lugar.
Sumala sa kapulisan, ang tagtungod ni Gonzaga nisugilon kanila nga way saktong pahuway si Gonzaga tungod sa pagsige og duwa sa computer ug motrabaho pa isip tigluto sa gitrabahoan nga kan-anan sa dapit.
“Giurom lagi daw ning bataa kay sige man na og computer unya way nay saktong pahuway,” matod sa usa ka higala niya.
Gisusi pa sa kapulisan kung wala bay foul play ang kamatayon sa biktima.
Sa laing bahin, dead-on-arrival ang usa ka lalake nga pasahero sa barko nga paingon unta og Manila human kini makasinati og severe asthma.
Ang biktima naila nga si Recafort Cipriano, 69, residente sa Macapagal, Mabalakat, Pampanga kinsa gidali pagdala sa sakop sa Coast Guard sa tambalanan aron unta matambalan.
Sa pakisusi sa Coast Guard Central Visayas, nibiya ang gisakyan sa biktima nga MV St. Francis Xavier sa alas 11:00 sa buntag niadtong Huwebes, Hulyo 11.
Apan alas 4:10 sa hapon sa samang adlaw nakadawat og taho ang Coast Guard pinaagi sa asawa sa kapitan sa barko nga si Catalina Montayre kabahin sa kahimtang ni Cipriano diin kasamtangan nga naglawig sila sa kadagatan sa Borbon.
Tungod sa maong panghitabo, daling nagpadala og speed boat ang Coast Guard Danao City ug gidali pagtabang ang biktima apan, wala na kini matabang ug gideklarar nga patay sa samang adlaw, Huwebes, Hulyo 11, sa alas 6:32 sa gabii. (Dugang taho ni HBL)