Patay ang usa ka 39 anyos nga lalaki human gibunalan og guod sa kawayan sa iyang silingan sa Barangay Cañorong, lungsod sa Samboan, habagatan sa lalawigan sa Sugbo, alas 9:00 sa gabii, Oktubre 24, 2023.
Sumala sa kasaligang tinubdan sa Superbalita Cebu, ang biktima giila nga si William Grafil, ulitawo, lumad sa naasoy nga dapit.
Siya gidala sa tambalanan apan namatay.
Dugang sa tinubdan, ang suspek mao ang iyang silingan nga si Angelito Toco, 33, ulitawo, apan dunay kapuyo.
Matod pa, ang biktima hubog ug giingong iyang gisagpa ang kapuyo sa suspek hinungdan sa kasuko ni Toco.
Ang suspek nagdala og guod sa kawayan, iyang gisulong ang biktima sa balay niini ug gibunalan kini sa iyang dala nga guod.
Si Grafil nga naigo sa ulo gidali pagdala sa Malabuyoc District Hospital apan gideklarar sa doktor nga patay na.
Si Toco nasikop sa kapulisan sa Samboan nga gipangulohan sa ilang hepe nga si P/Capt. Cristopher Torregosa. Kasong murder ang atubangon sa suspek. (DVG)