Ang officer-in-charge sa National Police Commission (NAPOLCOM) 7 nga si manlalaban Risty Sibay nasubo human nakaplagang patay nga dunay samad sa tampihak ang usa ka pulis nga sakop sa Regional Mobile Force Battalion (RMFB) 7 sulod sa kampo sa lungsod sa Sibonga, habagatang Sugbo.
Si Sibay nagkanayon nga kon naghikog si Patrolman Edgardo Silva, 32, sulod sa kampo kinahanglan nga mohimo og programa ang Philippine National Police (PNP) pag susi sa mental health sa matag sakop niini.
Matod niya nga di angay nga ibaliwala lang ang mental health problem sanglit daghan na ang nadisgrasya niini.
“I think this is a high time that the organization (PNP) shall also look into the mental state of all the police officers, and in the process hopefully, we can establish a national mental health program for the PNP,” matod ni Sibay.
Si Sibay niingon nga mahinungdanon kini nga programa aron mapugngan ang mga insidente sa pag hikog ilabi na nga ang kapulisan pressure kaayo sa trabaho.
Hinuon, gisuta pa kon aksidente o duna bay foul play nga nalambigit sa hitabo human nakaplagan nga dunay samad sa tuo nga tampihak si Silva.
Base sa mga hulagway nga gi-release sa kapulisan, si Silva nakaplagang naghigda samtang nagkupot sa iyang armas nga 9mm nga naa pa sa iyang dughan.
Si Silva nakit-an pa sa iyang kauban nga nag dry firing kun nagpusilpusil nga way bala sulod sa barracks sa kampo.
Nakit-an usab siya sa mga kauban nga ingon sa wa nahimutang nga nagsulod gawas sa barracks.
Gihulagway si Silva sa iyang mga kauban nga buotan, way gikaaway.
Ang pulis nga taga Tanjay, Negros Oriental, dunay kapuyo apan sa pakisusi, maayo ang ilang relasyon, wa sila mag-away.
Niadtong Septiyembre 2021, usa ka pulis nga sakop sa augmentation force sa Oplan Puyo sa Dakbayan sa Sugbo nakaplagang patay nga gituohang naghikog sulod sa ilang quarters sa Urot National High School sa Mabolo.
Tungod niini, ang Cebu City Police Office (CCPO) nimando sa tanang mga opisyal sa pag monitor sa mental health sa ilang mga ginsakpan.
Ang mao nga pulis sakop sa usab sa RMBFB 7.