Reklamo sa usa ka residente sa usa ka durugista nga namaligya og drugas nga gipadangat ngadto kang Lapu-lapu City Mayor Junard “Ahong” Chan nasikop sa kapulisan sa Huwebes, Agusto 18, 2022.
Ang grupo ni Police Lieutenant Noah Añana, team leader sa Drug Enforcement Unit (DEU) sa Lapu-Lapu City Police (LCPO), maoy ni-monitor ug niplano sa operasyon sa alas 5 sa hapon sa Huwebes, sa Purok Balanghoy, Brgy. Gun-ob.
Si Police Lieutenant Colonel Jul Mohammad Jamiri, pangu sa City Intelligence Unit (CIU) sa Lapu-Lapu City Police Office (LLCPO), niila sa mga nangadakpan nga sila si Jovel Estardo Hera, 24 ug Mc Quan Igot Rollon 38, pulos nagpuyo sa dapit.
Nasakmit gikan kanila ang 15 gramos sa shabu nga mokantidad og P102,000 subay sa standard drug price (SDP).
Matud ni Jamiri nga si Hera kanhi napriso sa susamang kaso samtang si Rollon duna usay kaso kaniadto nga ilegal gambling apan nakapiyansa ra.
DRUG DEN
Sa laing anti-drug operations, ang mga ahente sa Philippine Drug Enforcement Agency (PDEA)-7 nirumbo sa usa ka giingong drug den sa Barangay Duljo Fatima, Siyudad sa Sugbo sa Biyernes, Agusto 19.
Kapin sa P60,000 ang balor sa drugas nga nasakmit sa PDEA 7 gikan kanila ni Mary Ann Canoy, alyas An-an 44, giingong nagmintinar sa drug den, ug mga bisitang sila si Lorina Davide, 27; Royet Babano, 25; Crispin P. Babano, 33; ug usa ka Harvie June Misa, 32, pulos mga walay trabaho.
Atol sa operation, nasakmit nga drugas motimbang og 10 gramos nga mobalor og P68,000 subay sa SDP.
MASAHISTA
Usa ka masahista nga giingong nag sideline og pagpamaligya og illegal drugs nasikop sa buy-bust alas 12:50 sa kaadlawon sa Sabado sa Purok Tambis, Brgy. Yati, lungsud sa Liloan.
Ang suspek giilang si Beberlyn Branzuela, 41, alias Mercy, minyo. Nadakpan sab iyang silingan nga didto atol sa buy-bust nga si Roy Pepito, 52, minyo, food vendor.
Si Major Ramil Morpos, hepe sa Liloan Police Station nga nahinabi nga nahinabi sa Superbalita Cebu, nagkanayon nga si Branzuela nakuhaan og siyam ka pakite, usa ka medium nga putos, laing duha ka gagmayng putos, P500 nga halin ug P500 buy-bust money.
Ang drugas nga nasakmit motimbang og 10 gramos nga mobalor og P68, 000.
Sumala ni Morpos, nga sa ilang monitoring, ang ubang kustomer ni Branzuela magpakaaron-ingnon nga magpamasahi.