National canvassing gisuspenso sa Comelec

Gimando sa Commission on Elections (Comelec) ang pagsuspenso sa en banc session alang sa canvassing sa mga boto tungod sa ulahing pagpasa sa mga boto, matod ni Comelec chairman Saidamen Pangarungan sa Lunes, Mayo 9, 2022.

Si Commissioner Aimee Ferolino niingon nga ang en banc mopadayon sa canvassing karong Martes sa ala 1 sa hapon.

“The en banc through the chair, declared the early suspension since hindi pa naman talaga magta-transmit ‘yung ating mga VCMs (vote counting machines) and the report from VCMs will still have to pass the NBOC (National Board of Canvassers) and the PBOC,” matod niya sa usa ka press conference.

“So remember na magco-close ang voting generally by 7 p.m. so after that tsaka pa lang magka-count, so there is no point waiting kasi wala pa naman talaga kaming mare-recieve na results, that is why we will resume tomorrow pag meron nang mata-transmit to the NBOC,”dugang ni Ferolino. Giklaro sa Comelec nga walay postponement sa canvassing kondili deklarasiyon lang sa recess.

PAKYAS

Samtang, si Pangarungan niingon nga naglaum pa sila nga walay madeklarar nga failure of election sa bisan asang lugar sa nasud taliwala sa natala nga election-related incidents partikular na sa Bangsamoro region.

Sa pagkakaron, ang Philippine National Police (PNP) nakatala na og 16 ka kompirmadong election-related incidents sukad niadtong Enero, pagsugod sa election period.

Ubay-ubay na ang mga insidente sa pagpabuto ug strafing nga natala ilabina sa Maguindanao sukad niadtong Mayo 8. Kini nga mga insidente niresulta sa pagkaangol sa labing menos siyam ka mga tawo, samtang tulo pa ang namatay.

Bisan pa niini nga mga insidente sa Maguindanao ug ubang mga lugar sa Bangsamoro region, si PNP director for operations Major General Valeriano De Leon niingon nga medyo malinawon gihapon ang sitwasiyon sa rehiyon kon itandi sa nangaging mga eleksiyon.

Si De Leon miingon nga ang PNP, uban sa ubang mga pwersa sa seguridad sama sa Armed Forces of the Philippines ug Philippine Coast Guard, andam kaayo alang niining mga panghitabo. Apan si 103rd Infantry Brigade commander Brigadier General Jose Maria Cuerpo niingon nga aduna nay plano nga ideklarar ang failure of elections sa 14 ka barangay sa Tubaran, Lanao del Sur, nga usa sa mga unang lugar nga gipaubos sa Comelec control tungod sa mga hulga taliwala sa eleksiyon.

Si De Leon sa sayo pa miingon nga ang proseso sa eleksiyon sa Tubaran ulahi nga nagsugod tungod sa dili pagsinabtanay sa mga kandidato ug pagkalangay sa paghatod sa mga balota. (TPM sa SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph