Ang kampo ni manlalaban Regal Oliva, pangulo sa Mandaue City Treasurer’s Office, nagpanday karon og mga affidavit aron pasakaan og kasong kriminal ang netizen nga giingong ni-post og offensive comment batok sa LGBT community nga nagbitad sa ngalan sa Mandaue City Government.
Matod ni Oliva sa Martes, Hulyo 4, 2023, nga bag-o lang niyang gipirmahan ang affidavit ug ilang gitakda nga isumite kini sa City Prosecutor’s Office sa katapusan sa semana.
Matod ni Oliva nga mopasaka sila og mga kaso sa paglapas sa Safe Spaces Act o Republic Act no. 11313 (Bawal Bastos Law) ug ang Anti Discrimination Ordinance batok sa netizen nga si Roch Dungog.
Niadtong Hunyo 15, si Dungog ni-post sa Facebook og hulagway sa pride flags nga gitaod sa mga center island sa Mandaue roads nga dunay caption: “Ga bayot2 naman lage ning Flag sa Mandaue (Why Mandaue’s flag now gayish)?”
Gibutang ang mga bandera subay sa paghandom sa Siyudad sa selebrasyon sa Pride Month niadtong Hunyo.
Ang hulagway nga natangtang karon nahimong viral ug gipaambit sa daghang LGBTQ+ nga mga komunidad.
NAG-SORRY
Si Oliva niingon nga si Dungog ni-contact na kaniya ug nangayo og pasaylo sa iyang nabuhat, nipasabot nga wa siya kahibawo nga usa kini ka kalapasan.
Gihatagan og gibug-aton ni Oliva ang sumbanan sa moral ug maayong pamatasan sa usa ka tawo nga kinahanglan nga sundon, gipatugbaw nga ang mga tawo kinahanglan mag-amping sa pagpili sa ilang mga pulong pagsiguro nga dili kini makapasakit ni bisan kinsa o bisan unsang grupo sa komunidad.