NAPASAKAAN na og kasong robbery with homicide ang nagtulis ug nagpusil-patay sa usa ka graduating student samtang nagbaktas uban sa iyang higala niadtong Marso 29 sa Dalan Tres de Abril, Barangay Labangon, Dakbayan sa Sugbo.
Matud ni Police Major Keith Allen Andaya, hepe sa Labangon Police Station, nailhan ang suspek nga si Rizford Laurez human sa pagtulis ug pagpusil-patay kang Jovanie Pat, 21, taga Barangay Mambaling apan lumad nga taga Lungsod sa Dumanjug.
Gihulagway ni Police Major Andaya nga notado na nga tulisan si Rizford Laurez nga taga Duljo Fatima, Dakbayan sa Sugbo.
Nakapuyo usab kaniadto si Laurez sa A. Lopez diin siya ang gitumbok nga responsable sa pipila ka mga kaso sa pagpanulis sa Duljo Fatima ug mga silingang barangay.
“Naa'y nakaila dayon niya after niya natulis ug napatay ang biktima, mao to atong gi-build-up ug gihimo ang manhunt pero wala nato siya madakpi kay wala na man ni siya mouli sa ilaha,” ,matud ni Police Major Keith Allen Andaya.
Positibong gitudlo sa mga saksi sa dihang gipakita ang hulagway sa suspek lakip na ang kuha sa closed-circuit television camera.
Tinun-an sa usa ka unibersidad sa dakbayan sa Sugbo si Pat sa kursong Bachelor of Elementary Education nga mogardwar na unta karong tuiga.
Kahinumdoman nga gikan sa Bible Baptist Church sa Dalan Katipunan ang biktima.
Kauban niya si Qunie Ruth Antivo apan pag-abot sa Tres de Abril, kalit lang nangabot ang mga suspek.
Ang back rider sa motor mao'y mition og armas sa mga biktima ug mimando nga ihatag ang bag ni Antivo.
Nagdumili sa paghatag ang biktima. Gani, gibira pa ni Pat ang bag sa iyang kauban aron dili kini makuha apan gipusil siya tumong sa paa.
Dali nga misibat ang mga sakay sa motor nga mga tulisan sa wala matino nga direksyon.
Naabot usab dayon ang Mobile Patrol Group nga mao ra usab ang nagdala sa samaran sa Miller Hospital apan pipila ka gutlo ang milabay nakabsan gyud kini sa kinabuhi.
Giingong naigo ang dakong ugat ni Pat nga miresulta sa pag-agas sa daghang dugo nga mao'y nakaingon sa iyang kamatayon. (AYB)