Tinguha sa Kagamhanan sa Dakbayan sa Danao nga makab-ot ang smoke-free city.
Gusto niining palapdan pa ang kasamtamgan nga ordinansa nga nagdili sa pagpanigarilyo sa mga bahin sa siyudad.
Subay niini, gituki pag-usab sa Konseho sa Siyudad ang Anti-Smoking Ordinance No. 31-14 nga una nang gipasar sa 2014.
Base sa maong ordinansa, gidili ang pagpanigarilyo sulod sa Danao City Hall, sa palibot o duol sa edipisyo.
Apan atol sa tigom sa Konseho sa Siyudad sa Martes, Septiyembre 26, 2023, gusto niining palapdan pa ang lagda nga magpatuman niini sa tibuok siyudad.
Matod sa City Information Office sa Siyudad sa Septiyembre 27, 2023 nga namugna ang draft sa ordinansa atol sa maong tigom.
Gikatakda kining tukion pag-usab sanglit gusto sa Konseho nga magbutang usab og designated smoking areas.
Subay niini, tukoron usab sa Konseho ang task force nga maoy mo monitor unya sa pagpatuman sa ordinansa. Han-ayon usab niini ang mga silot nga atubangon sa tanang mosupak sa maong lagda.