USA ka nurse, frontliner sa krisis sa Covid-19, wala makauli sa iyang gipuy-an human wala pasudla sa mga nagbantay sa utlanan sa Sityo Sitio Callijon, Barangay Labangon, dakbayan sa Sugbo.
Ang babayeng nurse nga gi-trauma pa hangtod karon, wala pasudla sa mga volunteer sa border points sa maong sitio.
Sa video nga gi-upload ni Janly Grace L. Denol, nakita giunsa pagbastos sa mga nagbantay sa control point ning usa ka nurse.
“Unsa man dili ko ninyo pasudlon?,” matod sa nurse kinsa nagdumili una sa pagbutyag sa iyahang ilhanan human kini mahadlok.
“Sir, kahibawo ba ka Sir nga gipasod na ko diri gahapon?” tipik sa video dihang nakig-estorya ang nurse sa mga nagbantay.
Makita usab sa video ang pagsiyagit sa usa ka lalake diin giingnan ang nurse nga “Day, pangita’g balay day, palit og balay imo, condominium, subdivision.”
Matod ni Denol, kauban sa trabaho sa iyahang igsuon ang maong nurse.
Daw nag-abang kini sa Sitio Callijon, Labangon ug nagpabilin nga anaa sa maong sitio ang iyahang mga butang human wala na kini niya makuha kay wala na siya pasudla.
Makita usab sa video nga gikwestiyon sa nurse kon nganong dili siya pasudlon nga exempted man unta kini tungod kay usa ka medical personnel, “Duty man ko sir, kahibawo ba ka nga exempted mi?”
“So nagtuo mo Sir ako ang nagdala og virus?” pangutana sa maong nurse sa mga nagbantay diin kuha kini sa video.
Gi-upload ang maong video alas 9:13 sa buntag adlawng Sabado, Abril 25, ug sa pagkutlo ning balita niabot na sa kapin 216,000 ang views niini, kapin 2,700 ang reactions ug kapin 4,300 ang shares.
Usa ang Callijon sa Barangay Labangon sa mga dapit nga infected na ug apil sa ihap sa gatusan na ka mga positibo nga kaso sa Covid-19 sa dakbayan sa Sugbo.
Si Labangon Barangay Captain Vic Buendia sa iyahang bahin, nagkanayon nga dugay na ang maong insidente apan wala kini mohatag og igong petsa kon kanus-a kini nahitabo.
“People become paranoid of this crisis, they were all frontliners with different situation. We need to understand each other. We just need a proper communication and information in times like this. We should not fight each other instead we (should) cooperate and help one another (because) our enemy isn’t us, it’s the virus that we can’t see. We must not let the virus win and destroy ourselves,” si Buendia pinaagi sa text message niini sa Superbalita Cebu.
Ang dakbayan sa Sugbo nipasar sa ordinansa nga nagdumili pag-discriminate sa mga frontliner.
Gihimong balaod ang “The Frontliners Protection Ordinance of Cebu” niadtong Abril 1.
Mo-multa og P1,000 alang sa first offense ang mapamatud-an nga nilapas niini, P3,000 sa ikaduha, ug P5,000 sa ikatulo. Mamahimo usab kining prisohon og usa ngadto sa 30 ka adlaw.
Ang Cebu City Legal Office pinaagi ni City Attorney Rey Gealon nagkanayon nga nimando na si Cebu City Mayor Edgardo Labella og imbestigasyon kabahin sa maong insidente.
“The Mayor has specifically directed the CLO to conduct its investigation on the matter, in coordination with the PNP, and proceed in filing cases if warranted. By the looks of it, there seems to be a prima facie case,” si Gealon nagkanayon.
Dugang ni Gealon nga niumol na kini og team nga aduna’y tulo ka abogado aron motabang sa kapulisan aron maandam ang complaint-affidavit sa maong nurse lakip na ang supporting-affidavits sa mga witness.