Ang aplikasyon ug pagproseso sa mga building permit nagpabilin nga molungtad lang og usa ka oras sa dakbayan sa Sugbo, layo sa naandang tulo ka adlaw nga pagproseso, matod sa usa ka opisyal.
Kini gigarantiya ni Architect Florante Catalan, hepe sa Cebu City Office of the Building Official (OBO) ngadto sa mga partisipanteng developers ug contractors niadtong Huwebes, Hunyo 22, 2023 atol sa CEO Forum sa Philconstruct Visayas 2023 Expo sa Waterfront Cebu City Hotel & Casino, Cebu City.
Kini agi’g tubag sa hagit ni Cebu City Mayor Michael Rama nga pakunhuran ang tulo ka adlaw nga pagproseso sa mga building permit ngadto sa wala pay usa ka oras.
Uban sa usa ka oras nga pagproseso, giingon ni Catalan nga ang mga developer ug mga kontraktor mahimo nang magsugod sa ilang mga proyekto.
Mahimo kini gikan sa mubo ngadto sa taas nga building, nga mosangko sa daling pagtapos sa pagtukod.
Kini nga sistema gisugdan sa OBO kaniadtong Agusto 2022.
Matod niya nga ubos sa bag-ong sistema, sa panahon nga ang contractor o developer nag-upload sa ilang aplikasyon ug documentary requirements online, magdungan ang tanang buhatan sa pag-access niini, masusi ang mga dokumento ug maaprobahan sa wala pay usa ka oras.
Mahimo usab nga i-convert sa mga aplikante ang ilang mga dokumento ug plano sa digital nga porma ug i-save sa USB flash drive aron isumite sa OBO imbes mga papeles.
“With the system we are currently using, once the application and documentary requirements are uploaded, all sections coming from Architects, Civil Engineer, Electrical Engineers and so on can evaluate it simultaneously, ” matod ni Catalan. (EHP)