Gideklarar ni Presidente Ferdinand Marcos Jr. ang Oktubre 30, 2023 isip special non-working holiday alang sa pagpahigayon sa 2023 Barangay and Sangguniang Kabataan Elections.
Si Marcos niisyu sa Proclamation 359, nga nagdeklarar sa petsa isip usa ka espesyal nga non-working holiday sa tibuok nasod aron mahatagan ang katawhan og “bug-os nga oportunidad sa pag-apil” ug “paggamit sa ilang katungod sa pagboto.”
Sa Oktubre 5, ang Philippine National Police (PNP) niingon nga 2,911 ka mga lugar sa tibuok nasod ang giila nga election hotspots.
Sa maong gidaghanon, 357 ang ubos sa red category, 1,323 sa orange category ug 1,231 ubos sa yellow.
Si PNP chief Public Information Office (PIO) Colonel Jean Fajardo niingon nga 70 porsyento sa mga lugar nga ubos sa red category anaa sa Bangsamoro region.
Ang mga lugar nga ubos sa yellow nga kategoriya mao kadtong adunay kasaysayan sa kagubot nga may kalabutan sa eleksyon sa miaging duha ka mga piniliay, ingon man sa panahon sa karon nga eleksyon ug adunay grabe nga pulitikanhong panagribal.
Ubos sa orange nga kategorya mao ang mga lugar diin adunay seryoso nga armadong hulga gikan sa teroristang mga grupo ug uban pang susama nga armadong grupo, inubanan sa mga hinungdan nga gikonsiderar ubos sa yellow nga kategoriya.
Ang mga lugar nga ubos sa pula nga kategoriya mao kadtong gikabalak-an pag-ayo kay nagsagol ang mga hulga nga naa sa yellow ug orange. Kining mga dapita mahimong ibutang ubos sa kontrol sa Commission on Elections.
Sa Oktubre 9, ang PNP nakatala og kinatibuk-an nga 71 ka mga bayolente nga insidente taliwala sa election period.
Sa 71, walo na ang na-validate nga election-related, 18 ang gipailawom pa sa validation samtang 45 ang way labot sa umaabot nga eleksyon.
Sa pagkakaron, 1,208 ka indibidwal ang nasikop tungod sa kalapasan sa election gun ban samtang 912 ka mga armas ang nasakmit, 1,692 ang gi-deposito alang sa safekeeping ug 731 ang ni-surrender. (SunStar Philippines)