Usa ka kagawad sa Sangguniang Kabataan (SK) sa Barangay Pardo, siyudad sa Sugbo naangol sa aksidente sa motorsiklo, pasado alas 3:00 sa kaadlawon sa Lunes, Marso 13, 2023, sa dalan N. Bacalso, pasulod sa eskina sa Barangay Kinasang-an, dakbayan sa Sugbo.
Naangol mao si Chelsea Malazarte kinsa angkas sa motorsiklo nga gimaneho sa usa ka Jean Steven Bruce Cerna. Ang duha pulos call center agents.
Samtang nadumbolan niini nga motorsiklo gimaneho ni Odelon Legarde, taga Kinasang-an usab.
Sumala sa kapulisan, ang duha manag-uyab nga paingon motrabaho dihang nadumbolan ni Cerna ang motorsiklo ni Legarde sa naasoy nga dapit.
Si Legarde niingon nga paliko na unta siya sa dalan padulong sa wala nga bahin nga atbang sa eskina pasulod sa Kinasang-an diin nag-abot ang duha ka mga motorsiklo.
Si Malazarte gidala sa tambalanan samtang ang duha ka mga drayber sa motorsiklo gidala sa estasyon sa kapulisan alang sa dugang imbestigasyon kalabot sa aksidente.