Gisugyot nga ordinansahon nga maghimo sa Mandaue City College (MCC) nga usa ka departamento ubos sa Kagamhanan sa Dakbayan giduso ngadto sa Konseho atol sa regular session niini niadtong Martes, Agusto 22, 2023.
Si City Councilor Malcolm Sanchez, tagsulat sa gisugyot nga ordinansa, niingon nga ang transisyon usa ka “breakthrough” alang sa Kagamhanan sa Siyudad. Ang transisyon nagtumong sa pagpahapsay sa tanan nga mga kalihukan sa eskwelahan ug paghimo og mga oportunidad alang sa pagpalambo sa mga pasilidad sa eskwelahan.
“Once the MCC becomes a department of the Mandaue City Government, the budget would come directly from the city mayor’s office. We are looking forward to the [improvement of] services because of that,” siya niingon.
Sa pagkakaron, ang MCC usa ka independenteng institusyon nga gidumala sa Mandaue City Government. Ang Kagamhanan sa Dakbayan naghatag sa tunghaan og tinuig nga subsidy nga P10 milyunes gikan sa Special Education Fund niini.
Ang subsidy bag-o lang giumentuhan ngadto sa P40 milyunes atol sa investment planning sa lokal nga kagamhanan.
Ang gisugyot nga ordinansa anaa na karon sa committee on laws alang sa pag-review.
Gipaabot nga mosumiter kini og report ug mo-endorso sa ordinansa alang sa ikaduhang pagbasa atol sa regular session sa Konseho sa Dakbayan karong semanaha.
Samtang nagpaabot sa pag-aprobar sa gisugyot nga ordinansa, si Sanchez niingon nga ang Kagamhanan sa Dakbayan nagsugod na sa pagtrabaho sa proseso sa transisyon pinaagi sa pagtukod og technical working committee.
Ang konsehal nipasalig sa mga kawani sa tunghaan nga walay mabiyaan kon madayon ang transisyon.
Ang MCC naggamit og mga 70 ka mga teaching ug non-teaching personnel.
Sa laing bahin, si Sanchez, kinsa mao usab ang education committee chairman, niingon nga nagpaabot sila sa resulta sa submission sa tunghaan sa Certificate of Program Compliance (COPC) niini ngadto sa Commission on Higher Education sa Central Visayas (Ched 7) karong Hunyo 30, 2023.
Ang COPC usa ka pag-ila nga ang mga partikular nga degree programs nga gitanyag sa mga lokal nga unibersidad ug kolehiyo nagsunod sa sumbanan ug mga giya nga gitakda sa Ched. Kini nga pag-ila gikinahanglan alang sa eskwelahan nga magpadayon sa pagtanyag sa libreng tuition pinaagi sa Unified Student Financial Assistance System for Tertiary Education (UniFast) sa Ched. / HIC