NAGTINGUHA si Cebu Mayor Tomas Osmeña nga makabaton og balaod ang dakbayan sa Sugbo aron makasakmit ang mga traffic enforcer sa siyudad og driver's license gikan sa mga drayber nga badlungon sa karsada.
Kini ang usa sa mga plano sa mayor kon ilang makuha ang majority sa Konseho sa higayon nga modaog ang ilang pambato sa pagka presidente sa Association of Barangay Council nga si Kapitan Franklyn Ong sa Barangay Kasambagan.
"In addition to reviving Isla dela Victoria and the ordinance giving Citom authority to confiscate driver's licenses, I now have the freedom to pursue other policies to better our City," tipik sa post ni Osmeña sa iyang Facebook page.
Ubos sa balaud, way laing dunay gahom nga makasakmit og lisensya gawas lang sa Land Transportation Office (LTO) agents ug kadtong ilang gipang-deputize, base sa Republic Act 4136 nga mao say nag-umol sa LTO niadtong 1964.
Ubos sa Section 62 sa mao nga balaud, way konseho nga makapatuman og ordinansa o resulusyon nga mosukwahi niini.
Apan giamendahan kini niadtong 1991 nga nagtugot sa local government officers sa pagsakmit sa lisensya.
Ubos usab sa Local Government Code of 1991, gihatagan usab ang matag local government units (LGU) og police powers alang sa kaayuhan sa kinabag-an sa publiko.
Sa pagkakaron, adunay walo ka mga konsehal sa Team Rama ug walo sa Bando Osmeña Pundok Kauswagan (BOPK).
Apan kon molingkod na si Jessica Resch, Sangguninang Kabataan Chairman sa San Nicolas Proper isip SK Federation president ,kinsa ex-officio sa City Council mahimo na silang siyam ug moabot sa 10 kon ilang hingpit makuha ang liderato sa ABC.
Isla De La Victoria
Labing dako nga prayoridad ni Osmeña mao ang pagpadayon sa P18 bilyones nga development sa 9 ka ektarya nga Kawit island sa South Road Properties.
Ang resolution ni Konsehal Eugenio Gabuya Jr., nga maghatag og gahom ni Osmeña sa pagpirma sa joint venture agreement (JVA) gi-disapproved sa Konseho 9-8 atol sa voting sanglit gusto nila nga straight lease o direkta nga moabang ang investor sa yuta inay ipaagi sa JVA.
Si Konsehal Raymond Garcia nagkanayon nga mabuhi pa ang JVA apan magkinahanglan sila og 2/3 votes kon 12 ka mga konsehal ang mouyon sa pagbanhaw ug ang moduso nga konsehal mao kadtong kanhi nisupak subay sa house rules.
