WALA mabalaka si Mayor Tomas Osmeña sa pagpanumpa sa mga barangay kapitan sa dakbayan sa Sugbo hilabi na kadtong iyang mga kaalaydo sa Bando Osmeña Pundok Kauswagan (BOPK) ngadto kang Presidente Rodrigo Duterte dili pa lang dugay.
Si Osmeña nagkanayon nga dili matuis ang loyalty sa maong mga kapitan apan iyang gihulagway nga mapasigarbuhon ang maong mga barangay opisyal nga sila nihurar sa dili pa molingkod sa ilang pwesto mismo sa labing taas nga opisyal sa Pilipinas.
"They did not took their oath as PDP laban, they took their oath of office as barangay officials then the highest official in the land is the president so its an honor for them to take their oath of office before the president." Pasabot ni Osmeña.
Ang mayor niingon nga ang tanang mga kaalyado sa BOPK kampante nga ilang makuha ang liderato sa ABC sanglit 51 ka mga barangay chairman nga ilang kauban sa grupo.
Si Osmeña niingon nga ang iyang paningkamot nga makuha ang liderato sa ABC para sa mga Sugbuanon sanglit dili isya gusto og konseho nga maoy mobabag sa iyang mga programa ug proyekto sanglit kaniadto nagkuwang silag gidaghanon sa City council nga mosuporta sa iyang mga plano.
Si incumbent ABC President Phillip Zafra sa barangay Tisa nagkanayon nga moabot ngadto sa 75 ka mga barangay kapitan gikan sa dakbayan sa Sugbo ang nanumpa atubangan ni Duterte.
Ang maong lakang iyang gihangop sanglit kadto maoy labing unang higayon nga ang pangulo sa nasod mismo ang nag-administer sa oath taking sa mga kapitan.
Si Zafra niangkon nga nagkuwang sila og kaalyado aron subli siyang mapili isip presidente sa ABC apan siya nanghinaot nga motuhop sa alimpatakan sa iyang mga kauban nga kapitan nga iyang pagpapili dili tungod kay nilaban siya og partido kon dili ang kaayohan sa ilang asosasyon sa mga barangay kapitan sa dakbayan. (PAC)