DESIDIDO ang habig sa namatayng inahan nga giingong wala giatiman sa usa ka pribadong tambalanan sa dakbayan sa Lapu-Lapu sa pag-file og kasong kriminal ug administratiba batok sa tambalanan.
Kini ang gikompirmar ni Atty Robert Labe, ang co-legal counsel ni Joselito Sabayog, ang kapuyo sa namatayng inahan nga si Maribel Entera.
Matod ni Labe dihang nahinabi ning mantalaan nga gikatakda nilang pasakaan ug kasong kalapasan sa Republic Act 10932 kun Anti-Hospital Deposit Law ug Reckless imprudence resulting to Homicide ang ARC Hospital sa Barangay Agus nunot sa kamatayon ni Entera niadtong Disyembre 25.
Ang RA 10932 ipasaka usab nila isip administratibang kaso sa tambalanan aron mawad-an ug lisensya ang tambalanan.
Nakakwestyon si Labe nganong usa ra bag sa dugo ang anaa sa tambalanan bisan ug usa kini ka level 3 nga tambalanan.
Iya sab gitataw nga bisan ug nag-bleeding ang pasyenteng si Entera dihang miabot sa tambalanan apan conscious gihapon kini sanglit nakaestorya pa kini ni Sabayog.
Dihang miabot usab ang pasyente sa tambalanan ang downpayment ang unang gimando, sumala sa mga doktor ngadto kang Sabayog inay pag-atiman sa pasyente.
Gihimong basehanan ni Labe mao ang dul-an sa tulo ka oras nga pag-antos sa pasyente sa emergency room sanglit naabot kini sa tambalanan alas 8:45 sa buntag ug nakabsan kini sa kinabuhi alas 11:39.
Sumala pa sa kabanay nga diha na nagkara-kara ug atiman ang mga doktor kang Entera dihang miubos na pag-ayo ang blood pressure niini hangtod nga wala na matabang.
Apan, ang kadagkuan sa ARC Hospital una nang mihimakak sa mga pasangil nga aduna silay pagpabaya sa ilang pasyente sanglit ilang gibuhat ang tananh mahimo aron matabang ang pasyente nga si Entera dihang miabot sa ilang tambalanan. (GCM)