Usa ka P110 milyunes nga expansion project himuon sa pantalan sa lungsod sa Medellin aron makaakomodar og dugang mga barko ug biyahe ug mapadali ang pagdala sa ani sa tubo ngadto sa Isla sa Negros aron makasuporta sa dugang kalamboan sa amihanang Sugbo.
Kini sumala pa ni James Cirilo, port manager sa Port of Kawit sa Medellin, kinsa nidugang nga ang pagpalapad mahimo usab nga suporta sa tukuron nga economic zone.
“The purpose of the expansion is to provide additional docking facilities that will accommodate additional roro (roll-on/roll-off) vessels and conventional vessels,” matod ni Cirilo sa usa ka interview niadtong Agusto 10, 2023.
Gibutyag niya nga adunay usa lang ka shipping line nga nag-operate sa pantalan nga mobiyahe ngadto sa usa lang ka rota nga adunay duha ka schedules nga biyahe kada adlaw.
Busa, kon mahuman na ang proyekto, maisip nga maka-accommodate sa mas dagkong mga barko ug mas daghang shipping firms ang mahimong mopahigayon og operasyon.
Sa pagkakaron, ang EB Aznar Shipping Corporation lang ang naglihok nga nagtadlas sa rota nga Kawit paingon sa Santa Fe ug vice versa, matod sa port manager.
Dugang pa niya nga maghatag usab kini og mas maayong mooring structure alang sa mga roro vessels aron luwas nga modunggo sa pasilidad ilabi na sa dili maayong kahimtang sa panahon. Ang usa ka mooring mao ang bisan unsang permanente nga istruktura diin ang usa ka sakyanan sa dagat, sama sa barko, o amphibious nga eroplano, mahimong makadunggo.
Si Cirilio niingon nga ang maong proyekto pagapundohan sa Cebu Port Authority (CPA) sanglit gipanag-iya kini sa ahensya, apan kasamtangang gi-operate sa Munisipyo sa Medellin pinaagi sa lima ka tuig nga memorandum of agreement.
KARGA SA TUBO
Si Giles Anthony Villamor, municipal planning and development coordinator sa Medellin, nitug-an sa SunStar Cebu niadtong Agusto 11, nga suportahan usab niini ang industriya sa asukar sa lungsod nga nakasinati karon og paghinay.
“Currently, the sugar farm that is left, since the sugar milling firm here has closed. They transport their harvest to Negros Occidental to be milled. That is why our target once the port is finished and more roro vessels can dock in Port of Kawit so why do we have to go to Tabuelan so we can transport our harvests if we have our own port,” matod niya.
Si Villamor niingon nga ang mga ani sa tubo ihatod una sa pantalan sa lungsod sa Tabuelan sa amihanang kasadpan sa Sugbo aron dad-on kini sa Escalante City sa Negros Occidental ug sa katapusan sa Bais City sa Negros Oriental aron galingon.
Ang manager sa pantalan nga si Cirilo niingon usab nga pipila ka mga tubo sa Medellin ug Bogo City ang naghatod usab sa ilang mga ani ngadto sa Tabuelan aron ihatod sa Sagay Sugar Mill ug Lopez Sugar Mill nga nahimutang sa Sagay, Negros Occidental.
Si Cirilo niingon nga ang mga planter sa tubo makaprodyus og 5,000 ka metriko tonelada sa tubo nga ihatod matag semana, apan tungod sa gilay-on tali sa Medellin paingon sa Tabuelan Port ug sa taas nga linya didto, 3,000 ka metriko tonelada lang sa ilang produksiyon ang madala matag semana.
Ang Medellin 40 kilometros ang gilay-on gikan sa Tabuelan Port.
Si Municipal Mayor Joven “Benjun” Mondigo Jr. niingon nga iyang dasigon ang mga planter sa paggamit sa ilang lokal nga pantalan, diin ihatod ang ilang ani nga padung sa Negros Island sa higayon nga kini hingpit nang magamit.
Si Villamor, kinsa mao usab ang municipal tourism officer sa maong lungsod, niingon nga makahatag usab kini og kadasig sa industriya sa turismo sa higayon nga hingpit na kining magamit. (KJF)