MAKADAWAT og cash assistance ang 152 ka mga pamilya nga nabiktima sa sunog sa Sitio Superior, Barangay Looc, Dakbayan sa Mandaue niadtong Disyembre 6, 2020.
Gigahinan kini og P1,232,500 sa Dakbayan sa Mandaue isip tabang alang sa mga nasunogan tulo ka mga semana sa di pa ang Pasko. Giaprobahan na sa Konseho sa Dakbayan ang cash assistance niadtong Biyernes, Disyembre 11, 2020, nga ipanghatag sa di pa ang Pasko.
Ang mga tag-iya sa 99 ka mga panimalay nga “totally burned” makadawat og P10,000 samtang sa 10 ka nga “partialy burned” makadawat og P5,000.
Samtang, ang 34 ka mga nag-abang makadawat sab og P5,000 samtang ang siyam ka mga boarders makadawat og P2,500.
Matod ni Atty. John Eddu Ibañez, executive secretary ni Mandaue City Mayor Jonas Cortes, nga human makompleto ang lista sa mga nasunogan, gipadali ni Cortes ang pagpa-aprobar sa ayuda aron magamit dayon sa mga nasunogan.
Pinaagi sa hinabang pinansyal nga ihatag sa Dakbayan, niingon si Ibañez nga dunay magamit sa pagtukod og balik sa ilang mga balay ang nasunogan, labina sa hingpit nga nasunog.
Alang sa renters ug boarders, matod ni Ibañez nga magamit kini nila aron i-downpayment sa ilang balhinan nga abangan.
“Atong gipaspasan para before sa Pasko atong mahatag. Hopefully, in two weeks time before Pasko mahatag na ni,” sigon ni Ibañez. Kasamtangang gitan-aw pa sab sa kagamhanan ang pagpanag-iya sa lugar, kon makabalik pa ba og tukod sa ilang panimalay ang mga nasunogan, sigon ni Ibañez.
Sa laing bahin, sulod sa upat ka adlaw gikan nasunog ang Sitio Superior, Barangay Looc, mihatag sab ang City Social Welfare and Services (CSWS) og disaster relief goods. (KFD)