Gawas sa honorarium nga ilang madawat sa barangay kon asa sila nahimutang isip focal person sa Barangay Anti Drug Abuse Council (Badac) sa Dakbayan sa Talisay, dugang P1,000 nga honorarium ang ilang madawat gikan sa Kagamhanan sa Dakbayan human aprobahi ang gahin niini sa Konseho.
Si Konsehal Gail Restauro, tsirman sa komitiba sa peace and order and public safety sa Konseho sa Talisay City, nagkanayon nga naaprobahan ang gahin sa sesyon niadtong Martes, Enero 24, 2023 nga moepekto ning buwana.
Tungod niini, ang focal person sa Badac sa Talisay makadawat na og P3,000 matag kwarter sa tuig.
Si Lawaan 2 Barangay Captain Frederick “Reggie” Marababol nipadayag sa iyang kalipay sa maong kalambuan.
Matud ni Marababol nga alang kaniya angay pun-an ang honorarium sa matag focal person sa Badac sa mga barangay.
Dugang niini nga sa iya lang barangay, ang iyang focal person nagdawat og honorarium nga P6,500 gikan sa P5,000 matag buwan.
“Ang akoa karon mga P6,500. Naglainlain mi matag barangay. Depende na sa availabilty of funds nang atoang ihatag. Naaprobahan nana namo. Nabutang na sa plantilya na siya. So, kon naay dugang sa City Government, dakong tabang ni nila,” matud ni Marababol.