Usa ka milyon ka pesos ang danyos sa usa ka tindahan sa surplus nga motorsiklo sa Salinas Drive, Barangay Lahug, siyudad sa Sugbo, pasado alas 11:19 sa gabii sa Miyerkules, Abril 27, 2022.
Matud ni FO2 Fulbert Navarro, duty fire investigator sa Cebu City Fire Office, nibutyag nga alas 11:23 sa gabii gideklarar nga unang alarma ang sunog nga niigo sa APK Motor Trading sa naasoy nga dapit ug alas 11:29 sa gabii gideklarar nga pawong na ang kayo.
Matod ni Navarro, atol sa pag-ulbo sa sunog, kusog ang pagbundak sa ulan apan wala kini makapawong sa kayo.
Gawas sa pagkasunog sa tindahan, nasunog usab ang upat ka mga baligya nga sakyanan sulod sa tindahan.
Dugang ni Navarro, ang mga sakyanan gipanag-iya sa usa ka Arthur King.
Ang Cebu City Fire Office, atol sa pagkuha ning taho, nagsusi pa sa hinungdan sa pag-ulbo sa kayo ug nasayran nga dunay usa ka guwardiya nga si Jessie Baldado ang nag-duty.