BALOR P23.5 milyones nga pirated nga mga CD ug DVDs sa nagkadaiyang salida, local ug international man ang nasakmit sa Optical Media Board (OMB) gikan sa dul-an napulo ka mga stalls diha sa karaang merkado sa barangay Centro sa dakbayan sa Mandaue.
Ang operation sa OMB, tinabangan sa mga pulis sa Mandaue City Police Office, gihimo alas 9:30 Huwebes sa gabii, Enero 31.
Moabot tanan sa 168 ka mga sako sa maong nasakmit nga pirated CDs ug DVDs.
Ang operasyon pinanguluhan sa OMB Agent Glen Perez, kinsa nakig-alayon sa kapulisan sa MCPO alang sa maong operasyon, human sa gihimo nga mga surveillance sa nagkadaiyang dapit sa Dakbayan sa Mandaue, su’d sa pipila ka adlaw.
Ug nasuta nga naghitak na sab ang pagpamaligya sa mga pirated nga CD’s ug DVD’s sa syudad.
Gitug-an sa tigpamaba sa MCPO, Chief Inspector Mercy Villaro nga lain pa unya nga pag- pang-raid sa ubang mga lugar sa syudad nga giila na sa OMB sa mga mosunod nga adlaw o semana.
“Ang taga OMB gyud mismo nihimo una sa ilang pag-surveillance sa syudad, ug sa dihang’ nakita nila nga rampant gyud, daghan ni sila nga namaligya og pirated, kagahapon (Enero 31), niduol ni ilang OMB Agent dinhi sa MCPO, alang sa police assistance ug pag-secure sa ilang operatiba nga nihimo sa operation,” gitug-an ni Villaro sa Superbalita Cebu.
Wala hinuoy mga tawo nga nasikop atol sa operasyon, ilabi na nga kasagaran sa mga anaa, mga nagbantay lang ug di gyud tag- iya, ang uban usab ang matud ni Villaro ang dali nga nakadagan palayo sa lugar.
Ang mga sinako nga pirated DVD’s ug CD’s ang anaa pa karon sa buhatan sa MCPO, kay gamiton kini sa OMB isip ebidensya ngadto sa kompanya o indibidwal nga nanag-iya sa maong mga pirated, alang na sa pagpasaka sa kaso, una kini hingpit nga panggub-on.