MAG-UUMA nadakpan samtang nagtikad sa mga tanom nga marijuana nga mobalor sa kapin P2 milyunes kagahapon sa alas 7:50 sa buntag sa Sitio Taro, Barangay Bayong, lungsod sa Balamban.
Si Feliconio Sumalo,50, minyo, mag-uuma sa maong lugar, gipusasan human naaktuhan nga nagtikad sa plantasyon sa marijuana sa bakilid nga dapit sa ilang balay samtang nakadagan ang iyang anak nga si Eduardo Sumalo, 19.
Si Felicinio nakuhaan pa og usa ka frontier nga revolver nga dunay upat ka mga bala.
Si PO3 Emmanuel Blones, imbestigador sa Balamban Police Station, nibutyag sa Superbalita Cebu nga kini joint operation sa Balamban Police Station, uban nila ni Sr. Supt.Manuel Abrujena, direktor sa Cebu Provincial Police Office (CPPO), mga sakop sa Provincial Intelligence Branch (PIB), Provincial Drugs Enforcement Units (PDEU-CPPO), Provincial Mobile Force Company.
Matod pa ni Blones, nga mga usa ka simana nilang nahibaw-ang plantasyon sa marijuana sa lugar.
Sa pag-abot nila, nagtikad ang amahan ug anak pero nakadagan ang anak mao nga ang amahan nga natumba napusasan.
Ang mga fully-grown nga punoan sa marijuana moabot sa 5,200 og mobalor sa P2 milyunes base sa Dangerous Drugs Board (DDB) value.